Australian Open: Elena Rybakına bastapqy kezdesýin jeńispen aıaqtady

ASTANA. KAZINFORM – Qazaqstannyń birinshi, álemniń 5-raketkasy Elena Rybakına Aýstralııa ashyq chempıonatyn sátti bastady.

Qazaqstandyq tennısshi alǵashqy aınalymda álemdik reıtıngide 100-oryndaǵy slovenııalyq Kaııa ıÝvanmen sheberlik baıqasty.

Rybakına birinshi partııany breıkpen támamdady – 6:4.

Ekinshi sette esep 2:1 bolǵan mezette Elena breık jasaı bildi – 3:1. Aqyry matchty eıspen túıindedi – 6:3.

Bir saǵat 12 mınýtqa sozylǵan báseke barysynda qazaqstandyq sportshy 5 eıspen birge 2 breık-poınttan shashaý shyǵarǵan joq. ıÝvan 2 eıspen shekteldi.

Elena Rybakına úshinshi aınalymǵa ótý úshin álemniń 77-raketkasy, frantsııalyq, túbi reseılik Varvara Grachevamen talasady. Ol bastapqy kezdesýinde reıtıngide 83-satydaǵy shveıtsarııalyq Vıktorııa Golýbıchti qapy qaldyrdy - 6:1, 2:6, 6:1.

Qazaqstandyq tennısshiniń 2023 jyly Aýstralııa ashyq chempıonatynyń fınalynda oınaǵany belgili. Ótken jyly E.Rybakına tórtinshi aınalymda keıin chempıon atanǵan amerıkalyq Medıson Kızǵa jol bergen edi.

Erler arasynda juptyq synda qazaqstandyq tennısshilerdiń joly bolmady.

Aleksandr Býblık – Aleksandr Shevchenko alǵashqy aınalymda brazılııalyq Marselo Demolıner – nıderlandylyq Jan-Jýlen Roıeden nebári 59 mınýtqa sozylǵan matchta 3:6, 2:6 esebimen jeńilip qaldy.

Sondaı-aq biraz úzilisten keıin kortqa qaıta oralǵan Aleksandr Nedovesov – Andreı Golýbev argentınalyqtar Tomas Martın Etcheverrı – Kamılo Ýgo Karabelege ese jiberdi – 3:6, 4:6.

Eske sala keteıik, budan buryn tennısten Bıllı Djın Kıng kýbogynda Qazaqstan quramasynyń Kanadamen kezdesetinin jazǵan edik.