Australian Open: Elena Rybakına álemniń ekinshi raketkasyn jeńe ala ma
ASTANA. KAZINFORM – Melbýrnda Qazaqstannyń birinshi, álemniń 5-raketkasy Elena Rybakına Polsha ókili Iga Shventekpen shırek fınaldyq kezdesýin ótkizedi.
Tennıs áleminiń nazaryn aýdaryp otyrǵan match 28 qańtar kúni Qazaqstan ýaqytymen saǵat 05.30-ǵa belgilengen.
Bul qos sportshynyń ózara 12-inshi básekesi bolmaq. Ázirge esep – 6:5, álemniń burynǵy birinshi, qazirgi ekinshi raketkasy I.Shventektiń paıdasynda. Degenmen Melbýrn kortynda 2023 jyly tórtinshi aınalymda Rybakına Shventekti 6:4, 6:4 esebimen jeńgen. Sol jyly qazaqstandyq tennısshi fınalǵa deıin jetken.
The Tennis Letter álemdik basylymy bul oıyndy nazardan tys qaldyrǵan joq.
– Elena Rybakına men Iga Shventek Aýstralııa ashyq chempıonatynyń shırek fınalynda kezdesedi. Bul tartysqa toly taıtalas bolmaq. Iga ózara kezdesýlerde 6:5 esebimen alda keledi. Ol keıingi 5 matchtyń tórteýinde jeńgen. Biraq Elena ótken jyly Er-Rııadtaǵy WTA qorytyndy týrnırinde úzdik shyqqan. Sonymen qatar ol Aýstralııa ashyq chempıonatyndaǵy jalǵyz kezdesýde basym túsken. Áıelder tennısindegi úzdik oıyndardyń birinde kim jeńedi? - dep jazady basylym.
Mamandar Iga Shventektiń shıraq ta jyldam qımyldaıtynyna nazar aýdarsa, Elena Rybakınanyń dop berýde aldyna jan salmaıtynyn atap ótedi. Aýstralııa ashyq chempıonatynda jekeleı synda Qazaqstannan Elena Rybakına ǵana qaldy.
Búgin álemniń 1-raketkasy, Belarýs ókili Arına Sobolenko men reıtıngide 12-oryndaǵy ýkraınalyq Elına Svıtolına qarsylastaryn aıqyn basymdylyqpen jeńip, jartylaı fınalǵa shyqty.
E.Rybakına — I.Shventek jubynyń jeńimpazy jartylaı fınalda qos amerıkalyq Djessıka Pegýla – Amanda Anısımovanyń qaı jeńgenimen kezdesedi.
Juptyq synda Anna Danılına serbııalyq Aleksandra Krýnıchpen birge erteń tańmen jarystyń 1-raketkalary, chehııalyq Katerjına Sınıakova – amerıkalyq Teılor Taýnsendpen jartylaı fınal joldamasyn sarapqa salady.
A.Danılına amerıkalyq Djeıms Treısımen birge aralas jupta búgin shırek fınalda brazılııalyq Lýıza Stefanı — salvadorlyq Marselo Arevalodan óte almady – 6:2, 4:6, 7:10.
Jasóspirimder arasynda 17 jastaǵy Damır Jalǵasbaı osy jarystyń 10-raketkasy, aýstrııalyq Tılo Bermanǵa jol berdi – 3:6, 6:7 (3:7).
Jasóspirimder arasynda álemniń 12-inshi, chempıonattyń 8-raketkasy, 17 jastaǵy Zańǵar Nurlanuly da erteń asa mańyzdy kezdesýin ótkizedi. Ol dodanyń 9-raketkasy, reseılik Savva Rybkındi jeńse, shırek fınalǵa shyǵady.
Eske sala keteıik, budan buryn Aýstralııa ashyq chempıonatynda Zańǵar Nurlanulynyń úshinshi aınalymǵa joldama alǵanyn jazǵan edik.
Sondaı-aq Elena Rybakına ótken jylǵy kórsetkishin jaqsartty.