Australian Open: áıelder arasynda jartylaı fınalǵa shyqqan tennısshiler anyqtaldy

ASTANA. KAZINFORM – Aýstralııa ashyq chempıonatynda áıelder arasynda jartylaı fınalǵa shyqqan tennısshiler anyqtaldy.

Ótken jyly fınalda qazaqstandyq Elena Rybakınany jeńgen álemniń 2-raketkasy Arına Sobolenko bıyl da chempıondyqqa bettep keledi. Osyǵan deıin qarsylastaryna birde-bir set bermegen Sobolenko shırek fınalda álemniń 11-raketkasy, chehııalyq Barbora Kreıchıkovany da ońaı utty – 6:2, 6:3. 

Endi Belorýs ókili jartylaı fınalda álemniń 4-raketkasy, 19 jastaǵy amerıkalyq tennısshi Korı Gaýffpen kim myqtyny anyqtaıdy. Osy oıyn chempıondyq ataq úshin sheshýshi bolýy ábden múmkin. 

Jas bolsa da jasyndaı jarqyldap júrgen Gaýff  shırek fınalda asa tartysty matchta ýkraınalyq Marta Kostıýkti qapy qaldyrdy – 7:6 (8:6), 6:7 (3:7), 6:2.

Aýstralııa ashyq chempıonatynda álemdik reıtıngide 93-orynda turǵan 23 jastaǵy ýkraınalyq tennısshi Daıana ıAstremskaıanyń jartylaı fınalǵa jetýiniń ózi úlken erlikke balanyp otyr. Qarsylastaryn qoǵadaı japyryp kele jatqan bul sportshy jarys barysynda «Úlken dýlyǵa» týrnıriniń jeńimpazdary - chehııalyq Marketa Vondroýshova men belorýs ókili Vıktorııa Azarenkony joldan taıdyrdy. Al shırek fınalda osyǵan deıin álemniń 1-raketkasy, Polsha ókili Iga Shventekti utqan 19 jastaǵy chehııalyq Lında Noskovadan aılasyn asyrdy – 6:3, 6:4. 

ıAstremskaıaǵa jartylaı fınalda álemniń 15-raketkasy, qytaılyq Chjen Tsınven  qarsylas atandy. Ol reıtıngide 75-satydaǵy reseılik Anna Kalınskaıany jeńdi – 6:7 (4:7), 6:3, 6:1.

Otandasymyz Elena bul týrnırde sátti óner kórsetkende qytaılyq tennısshimen kezdesýi yqtımal edi. Ókinishke qaraı Rybakına ekinshi aınalymda reseılik Anna Blınkovaǵa ese jiberdi. Anna kelesi aınalymda ıtalııalyq ıAsmına Paolınıden jeńilip qaldy. Al Paolınıdi Kalınskaıa toqtatqan edi.

Eske sala keteıik, budan buryn Aýstralııa ashyq chempıonatynda jasóspirimder arasynda qazaqstandyqtardan alǵash bolyp Ámir Omarhanovtyń shırek fınalǵa shyqqanyn jazǵan edik.

Aýstralııa chempıonatynda Asyljan Arystanbekova jartylaı fınaldan tys qaldy.