Australian Open: Anna Danılına shırek fınalǵa shyqty

ASTANA. KAZINFORM – Qazaqstannyń juptyq syndaǵy birinshi, álemniń 14 raketkasy Anna Danılına Aýstralııa ashyq chempıonatynyń shırek fınalyna joldama aldy.

Jarystyń 7-raketkasy bolyp tirkelgen A.Danılına serbııalyq Aleksandra Krýnıchpen birge úshinshi aınalymda aýstralııalyqtar Maııa Djoınt – Storm Hanterge qarsy keldi.

Birinshi partııada kort ıeleri 4:2 esebimen alǵa shyqqanymen, qazaqstandyq-serbııalyq jup tarazy basyn ózderine aýdara aldy – 7:5.

Ekinshi sette Danılına – Krýnıch 2:0, 4:1 esebimen alǵa ketti. Biraq aýstralııalyqtar da berispedi. Degenmen taı-breıkte qazaqstandyq-serbııalyq jup jeńisti julyp aldy - 7:6 (8:6).

Ek saǵat 13 mınýtqa sozylǵan tartysty básekede Anna – Aleksandra juby 2 eıspen birge 14 breık-poınttyń tórteýin múlt jibermedi. Djoınt – Hanter 3 breıkpen (13 breık-poınt) shekteldi.

Anna Danılına – Aleksandra Krýnıch jartylaı fınalǵa shyǵý úshin dodanyń 1-raketkalary, chehııalyq Katerjına Sınıakova – amerıkalyq Teılor Taýnsendpen talasady.

Qazaqstannyń jekeleı syndaǵy ekinshi, álemniń 94-raketkasy ıÝlııa Pýtıntseva shırek fınaldan tys qaldy. Ol álemniń 27-raketkasy, amerıkalyq, 18 jastaǵy Iva Iovıchten oısyraı utyldy – 0:6, 1:6.

Eske sala keteıik, budan buryn Aýstralııa ashyq chempıonatynda Elena Rybakınanyń tórtinshi aınalymǵa joldama alǵanyn jazǵan edik.

Sondaı-aq 18 jastaǵy Ámir Omarhanov Ispanııadaǵy týrnırde chempıon atandy.