Australian Open: Anna Danılına ekinshi ret fınalǵa joldama aldy

ASTANA. KAZINFORM – Qazaqstannyń juptyq syndaǵy birinshi, álemniń 14-raketkasy Anna Danılına Aýstralııa ashyq chempıonatynyń fınalyna shyqty.

Qazaqstandyq tennısshi serbııalyq Aleksandra Krýnıchpen birge osy «Úlken dýlyǵa» týrnırinde jetinshi jup bolyp tirkelse, jartylaı fınaldaǵy qarsylastary, kanadalyq Gabrıela Dabrovskı – brazılııalyq Lýıza Stefanı dodanyń 5-raketkasy edi. 

Birinshi partııada esep 3:2 bolǵan mezette qazaqstandyq-serbııalyq dýet breık jasaı aldy – 4:2.

Áıtse de esep 5:3 bolyp, Krýnıch setke dop bergende, Dabrovskı – Stefanı qaıyra breık jasap ketti. Degenmen taı-breıkte Danılına – Krýnıch sátti oınady – 7:6 (7:2). 

Ekinshi sette esep 4:3 bolǵanda, brazılııalyq-kanadalyq jup breıkke qol jetkizdi – 6:3.

Úshinshi, sheshýshi partııany Dabrovskı – Stefanı breıkpen bastady – 2:0. Biraq Danılına – Krýnıch tarazy basyn teńestirip qana qoımaı, ózderi alǵa ketti – 5:3. Tek Krýnıch matchqa dop bergende, múmkindikterin múlt jiberdi. Degenmen Krýnıch qateligin túzetip, Danılına ekeýi oıyndy breıkpen túıindedi – 6:4. 

Eki saǵat 20 mınýtqa sozylǵan básekede Anna – Aleksandra 3 eıspen birge 11 breık-poınttyń jeteýin paıdalandy. Dabrovskı – Stefanı 4 eıs, 7 breıkpen (14 breık-poınt) kózge tústi.

Anna Danılına – Aleksandra Krýnıchtiń fınaldaǵy qarsylastary keıin anyqtalady.

Osylaısha, qazaqstandyq tennısshi sporttyq jolynda ekinshi ret fınalǵa joldama aldy. 

A.Danılına osyǵan deıin 2022 jyly brazılııalyq Beatrıs Haddad Maııamen birge Aýstralııa birinshiliginde fınalǵa deıin jetip, chehııalyqtar Barbora Kreıchıkova – Katerjına Sınıakovaǵa jol bergen edi – 7:6 (7:3), 4:6, 4:6. 

Búgin Qazaqstannyń jekeleı syndaǵy birinshi, álemniń 5-raketkasy Elena Rybakına reıtıngide 6-oryndaǵy amerıkalyq Djessıka Pegýlamen fınal joldamasyn sarapqa salady. 

Eske sala keteıik, budan buryn Aýstralııa ashyq chempıonatynda Rybakınanyń álemniń 2-raketkasyn utyp, jartylaı fınalǵa ótkenin jazǵan edik.

Sondaı-aq Zańǵar Nurlanuly alǵash ret shırek fınalǵa shyqty.

Anna Danılına jarystyń 1-raketkasyn jeńip, jartylaı fınalǵa shyqty.