Australian Open: Aleksandr Býblık tarıhı nátıjege qol jetkizdi

ASTANA. KAZINFORM – Qazaqstannyń birinshi, álemniń 10-raketkasy Aleksandr Býblık sporttyq jolynda alǵash ret Aýstralııa ashyq chempıonatynyń tórtinshi aınalymyna ótti.

Qazaqstandyq tennısshi úshinshi aınalymda álemdik reıtıngide 62-oryndaǵy argentınalyq Tomas Martın Etcheverrımen jolyqty. Týra bir saǵatqa sozylǵan birinshi partııada Býblık qarsylasyn taı-breıkte tyqsyra bildi – 7:6 (7:4).

Ekinshi sette de Aleksandr taı-breıkte esesin jibermedi – 7:6 (7:5). Úshinshi partııany Býblık breıkpen bastady – 2:0. A.Býblıkke osy breık jetkilikti boldy – 6:4.

Eki saǵat jarymnan astam ýaqytqa sozylǵan tartysty básekede A.Býblık 21 eıspen birge 4 breık-poınttyń bireýin óz esebine jazdy. Etcheverrı 10 eıs jasaǵanymen, 3 breık-poıntyn paıdalana almady. Osylaısha, A.Býblık jańa jyldaǵy jeńis serııasyn 7 matchqa jetkizdi. Munyń aldynda ol Gonkong ATP 250 týrnıriniń jeńimpazy atanǵan edi.

Sonymen qatar A.Býblık barlyq tórt «Úlken dýlyǵa» týrnıriniń 1/8 fınalyna ótken alǵashqy qazaqstandyq tennısshi atanyp, tarıhı nátıjeni tirkedi.

Aleksandr Býblık shırek fınalǵa shyǵý úshin álemniń 6-raketkasy, aýstralııalyq Aleks de Mınormen talasady. Ol úshinshi aınalymda álemniń 34-raketkasy, amerıkalyq Frensıs Tıafony joldan taıdyrdy – 6:3, 6:4, 7:5.

Eske sala keteıik, budan buryn Aýstralııa ashyq chempıonatynda Elena Rybakınanyń ekinshi jeńisine qol jetkizgenin jazǵan edik.

Aýstralııa chempıonatynda ıÝlııa Pýtıntseva alǵash ret tórtinshi aınalymǵa ótti.

Anna Danılına kelesi aınalymǵa joldama aldy.