Australian Open: Aleksandr Býblık ekinshi oıynynda jeńilip qaldy
NUR-SULTAN. QazAqparat – Qazaqstannyń birinshi, álemniń 45-raketkasy Aleksandr Býblık Aýstralııa ashyq chempıonatynyń úshinshi aınalymyna shyǵa almady, dep habarlaıdy QazAqparat tilshisi.
A.Býblık ekinshi kezdesýin álemniń 27-raketkasy, serbııalyq Dýshan Laıovıchpen ótkizdi.
Birinshi sette serbııalyq sportshy 6:4 esebimen basym tústi.
Ekinshi partııada esep 3:3 bolǵannan keıin A.Býblık breıkpen alǵa ketti. Tipti 5:3-ke jetkizip, setke dop berdi.
Odan keıin de setboldaryn paıdalana almady. Aqyry taı- breıkte D.Laıovıch sátti oınaı bildi – 7:6 (7:4).
Úshinshi sette esep 4:4 bolǵan mezette qazaqstandyq tennısshi breık jasap, sosyn óz geımin de aldy – 6:4.
Tórtinshi partııada esep 4:3 bolǵanda, D.Laıovıch breık jasap ketti. Sosyn matchqa dop bergende, qatelesken joq – 6:3.
Tartysty báseke 3 saǵat 3 mınýtqa sozyldy.
D.Laıovıch úshinshi aınalymda álemniń 87-raketkasy, ıspanııalyq Pedro Martınes - Porteromen sheberlik baıqasady.
Osylaısha erler arasynda jekeleı synda Qazaqstannan eshkim qalmady.
Eske sala keteıik, budan buryn Zarına Dııastyń úshinshi aınalymǵa shyqqanyn, Dmıtrıı Popko Italııadaǵy týrnırdi sátti bastaǵanyn jazǵan bolatynbyz.
Sondaı-aq Mıhaıl Kýkýshkın juptyq synda Aýstralııa birinshiliginiń ekinshi aınalymyna shyqty.
Elena Rybakına úshinshi aınalymǵa shyǵa almady.
