Australian Open: Aleksandr Býblık ekinshi aınalymǵa shyqty
NUR-SULTAN. QazAqparat – Qazaqstannyń birinshi, álemniń 45-raketkasy Aleksandr Býblık Aýstralııa ashyq chempıonatynyń ekinshi aınalymyna shyqty, dep habarlaıdy QazAqparat tilshisi.
A.Býblık bastapqy kezdesýin reıtıngte 58-orynda turǵan slovenııalyq Alıaj Bedenemen ótkizdi.
Birinshi partııada qazaqstandyq tennısshi basymdylyǵyn tanytty – 6:4.
Ekinshi sette esep 5:5 bolǵan mezette A.Býblık breık jasaı bildi. Sosyn óz geıminde múmkindigin jibergen joq – 7:5.
Esesine úshinshi partııany A.Bedene breıkpen bitirdi – 7:5.
Tórtinshi sette esep 4:4 bolǵan mezette qazaqstandyq sportshy breıkke qol jetkizdi. Sodan keıin ekinshi matchbolyn paıdalana aldy – 6:4.
Tartysty ótken báseke 2 saǵat 38 mınýtqa sozyldy.
A.Býblık ekinshi aınalymda álemniń 26-raketkasy, serbııalyq Dýshan Laıovıch nemese reıtıngte 201-satydaǵy ýkraınalyq Sergeı Stahovskııdiń bireýimen kortqa shyǵady.
Ótken jyly osy «Úlken dýlyǵa» dodasynda A.Býblık te, M.Kýkýshkın de alǵashqy aınalymnan asa almaǵan bolatyn.
Eske sala keteıik, budan buryn Zarına Dııastyń Aýstralııa ashyq chempıonatyn jeńispen bastaǵanyn, al Mıhaıl Kýkýshkınniń AQSh chempıonynan utylyp qalǵanyn jazǵan bolatynbyz.
