Australian Open-2023: Tımofeı Skatov irikteý saıysyn jeńispen bastady

ASTANA. QazAqparat – Qazaqstandyq Tımofeı Skatov Aýstralııa ashyq chempıonatynyń irikteý saıysyn jeńispen bastady, dep habarlaıdy QazAqparat tilshisi.

Álemniń 144-raketkasy T.Skatov alǵashqy aınalymda dúnıejúzilik reıtıngte 215-orynda turǵan amerıkalyq Nıkolas Moreno de Alboranmen kezdesti.

Qazaqstandyq sportshy eki sette 6:3, 6:4 esebimen jeńiske jetti. 1 saǵat 23 mınýtqa sozylǵan báseke barysynda Petropavl qalasynyń túlegi 1 eıs jasap, 5 breık-poınttyń ekeýin paıdalandy. Qarsylasy 5 eıspen kózge tústi.

T.Skatov irikteý saıystarynyń fınalyna shyǵý úshin álemniń 155-raketkasy, chılılik Nıkolas Harrımen talasady.

Taǵy bir qazaqstandyq, reıtıngte 195-oryndaǵy Mıhaıl Kýkýshkın irikteý saıysyndaǵy bastapqy kezdesýin álemniń 157-raketkasy, aýstralııalyq Djeıms Dakvortpen ótkizedi.

Eske sala keteıik, budan buryn Elena Rybakınany Aýstralııadaǵy jarysta jeńilip qalǵanyn jazǵan bolatynbyz.

Sondaı-aq Anna Danılına alǵash ret álemdegi úzdik on tennısshiniń qataryna kirdi.

Foto: ktf.kz