Aýsyl men qus tumaýy: Ázerbaıjan keıbir elden ımportty toqtatty

ASTANA. KAZINFORM — Janýarlar men qustardyń aýrýlaryna baılanysty Ázerbaıjanda keıbir óńirden ımportqa ýaqytsha shekteýler engizildi, dep habarlaıdy AZERTADJ.

Dúnıejúzilik janýarlar densaýlyǵy uıymynyń (DJDU) resmı derekterine sáıkes, Mońǵolııanyń Ulan-Batyr qalasynda aýsyl, Soltústik Makedonııanyń soltústik-shyǵys, Pelagonııa jáne shyǵys aımaqtarynda, Slovenııanyń Notransk-Krashka óńirinde blıýtang aýrýy, Kambodja Koroldiginiń Battambang provıntsııasynda, Ispanııa Koroldiginiń Estremadýra avtonomııalyq qaýymdastyǵynda jáne AQSh-tyń Pensılvanııa shtatynda joǵary patogendi qus tumaýy tirkeldi.

Bul týraly Ázerbaıjan Respýblıkasynyń Azyq-túlik qaýipsizdigi agenttiginiń (AQA) Aqparattyq qamtamasyz etý jáne ınnovatsııalyq sheshimder basqarmasy málimdedi.

Agenttik osy juqpaly aýrýlardyń respýblıka aýmaǵyna taralýynyń aldyn alý maqsatynda jáne atalǵan aýmaqtardaǵy zonırleý qaǵıdatyn eskere otyryp, Dúnıejúzilik janýarlar densaýlyǵy uıymynyń «Jer ústi janýarlarynyń densaýlyq kodeksine» sáıkes, qostuıaqty janýarlardy (iri jáne usaq qara mal, shoshqa, túıe jáne t.b.), olardyń ónimderin, qus pen qus sharýashylyǵy ónimderin ımporttaýǵa ýaqytsha shekteýler engizgenin habarlady.

Sonymen qatar, Ázerbaıjan Memlekettik keden komıtetine tıisti sharalar qabyldaý týraly resmı ótinish joldandy.

Budan buryn Ázerbaıjanda mańyzdy aqparattyq ınfraqurylymnyń qaýipsizdigin baqylaý jónindegi birlesken komıssııa qurylǵany anyqtaldy.