Aýrýynan aıyǵyp shyqqan Túrkistan oblysynyń turǵyndary dárigerlerge alǵys aıtty
TÚRKІSTAN. QazAqparat – Túrkistan oblysy boıynsha aýrýhanada jatqan naýqastar sany azaıyp keledi. Koronavırýs pen pnevmonııa juqtyrǵan naýqastar ınfektsııalyq aýrýhanalar men provızorlyq ortalyqtarda em qabyldaýda, dep habarlaıdy QazAqparat tilshisi.
Máselen, Túrkistan qalalyq ortalyq aýrýhanasynda em qabyldap jatqan Saragúl Tileýbergenova ózine qajetti barlyq dári-dármek mólsheri jetkilikti ekenin aıtady. 67 jastaǵy naýqas qalalyq aýrýhanaǵa aýyr halde 12 kún buryn jetkizilgen bolatyn. Júrek talmasy men qan aınalymynyń buzylýynan onyń jaǵdaıy nasharlap, jedel-járdemge júgingen. Artynan qatty jótel qysyp, tynys alýy nasharlaǵan. Aýrýhanada jatqan ýaqyt ishinde tıisti em-domyn alyp, búginde aýrýynan tolyǵymen aıyqty. Ózi de 40 jyl medıtsına salasynda qyzmet atqarǵan Saragúl Tileýbergenova dárigerlerge alǵysyn bildirdi.
«Men ózim de 40 jyl boıyna medıtsıtsına salasynda jumys istedim. Aýyryp aýrýhanaǵa túskeli beri munda dári-dármekter, ne bolmasa basqadaı qajettilikter jetispeıdi degen aıtqan emes. Dárigerler kúndiz-túni muqııat qarap, emdep shyqty. Sol aq halatty abzal jandardyń arqasynda jazylyp, shyǵýǵa daıyndalyp jatyrmyn»,- deıdi zeınetker.
Taǵy bir naýqas Saıara Omarova da 10 kún buryn aýrýy asqynyp, aýrýhanaǵa túsken. 35 jyl muǵalim bolyp jumys istegen 61 jastaǵy naýqas buǵan deıin aýrýhanaǵa jatyp kórmegen. Aq halatty abzal jandardyń arqasynda qazir jaǵdaıy qalypqa túsip, búgin aýrýhanadan shyqqaly jatyr.
«Dárigerler - qazirgi zamannyń naǵyz qaharmandary. Olardyń eńbegi ólsheýsiz ári baǵaly. Búginde adam janynyń arashasyna aınalǵan dárigerler óz biliktilikterin kórsetýde. Aýrýdan aıyǵyp, ózimdi qaıta týǵandaı sezinip otyrmyn»,- deıdi Saıara Omarova.
