Aýrýxanalardy biriktirsek, xalyq ary-beri shapqylap júrmeýi kerek - Saǵyntaev
ASTANA. QazAqparat - QR Densaýlyq saqtaý mınıstri Eljan Birtanov aýrýxanalardy jańadan salǵan kezde jergilikti jerdiń ǵana emes, kórshi aýdandardyń qajettilikterin de eskerý kerek dep sanaıdy. Sóıtip, kópbeıindi emxanalardy salýǵa bolady. Al qazirgi aýrýxanalardy ózara biriktirý arqyly kópbeıindi emdeý mekemelerin qurýǵa múmkindik bar, dep xabarlaıdy QazAqparat tilshisi.
"Máselen, bir oblysta onkologııalyq emxana salynsa, basqa aýdandardyń qajettiligin eskere otyryp, atalǵan qurylys nysanyn keńeıtip turǵyzýǵa bolady. Al qazirgi aýrýxanalardy sharbaqty alyp tastaı salyp, biriktirip jiberýge bolady. Sebebi ondaı mekemeler kóp jaǵdaıda bir jerde ornalasqan. Arasyn tek tosqaýyldar ǵana bólip tur", - deıdi Birtanov.
Osy oraıda Úkimet basshysy Baqytjan Saǵyntaev bir-birinen shalǵaı ornalasqan emxanalardy da eskerýdi tapsyrdy. "Mysaly, aýrýxanalar qalanyń eki jaq shetinde ornalassa, adamdar bir qyzmetti alý úshin bir jaqqa, ekinshi qyzmetti alý úshin ekinshi jaqqa shapqylap júrýge májbúr bolady. Ondaıǵa jol bermeý kerek", - dep atap kórsetti Saǵyntaev Úkimettiń búgingi otyrysynda.
Densaýlyq saqtaý mınıstri Eljan Birtanov osy saladaǵy barlyq máselelerdi zerdelep, naqty bir josparmen keletinin jetkizdi.
Aıta keteıik, Densaýlyq saqtaý mınıstrligi medıtsınalyq mekemelerge qatysty jańa normatıvti engizýdi kózdeıdi. Sonyń aıasynda aýrýxanalardy ózara biriktirip, kópbeıindi emdeý mekemelerine aınaldyrý josparlanǵan. Mınıstrdiń aıtýynsha, ákimshilik apparaty qysqartýdyń arqasynda bıýdjettiń biraz qarajatyn únemdeýge bolady. "Ákimishlik qysqartý degenimiz, biz úsh bas dárigerdiń ornyna bir bas dáriger qoıamyz. Qazir bir bas dáriger aıyna 300-400 myń teńge jalaqy alady. Oǵan qosa, orynbasarlary, býxgalterııasy jáne taǵy basqa ákimshilik shyǵystary taǵy bar. Sonyń bárin únemdeýge bolady. Árıne, únemdelgen aqsha qarapaıym meıirbıkeler men dárigerlerdiń jalaqysyna jumsalatyn bolady", - dedi Densaýlyq saqtaý mınıstri Eljan Birtanov QazAqparat tilshisine bergen suxbatynda .
