Aýrýhanaǵa jetip úlgermegen balaǵa dárigerler ózi kelip, ajaldan alyp qaldy
ALMATY. KAZINFORM — Almatyda aq halatty jandardyń biliktiligi synalǵan oqys oqıǵa oryn aldy. Almaty qalalyq balalar shuǵyl medıtsınalyq kómek kórsetý ortalyǵynyń (BShMKKO) reanımatsııalyq brıgadasyna eki jasar balaǵa ózderi barýǵa týra keldi.
Úı men jumys arasyndaǵy qarbalas ýaqytta jedel járdem brıgadasy tunshyǵyp jatqan balany balalar aýrýhanasyna alyp bara jatady.
Sábıdiń jaǵdaıy tipti nasharlaı bastaǵanda dárigerler ýaqytty bosqa ótkizbeı, jaqyn jerdegi Qazybek bı kóshesindegi qalalyq jedel shuǵyl kómek kórsetý aýrýhanasyna (QJShKKA) aparýdy uıǵarady.
Bala birden osy aýrýhananyń jansaqtaý bólimine jatqyzylyp, reanımatologtar Geımlıh tásilin qoldanyp, ishtegi bóten zatty alyp tastaýǵa birneshe ret árekettengenimen, ókinishke qaraı, nátıje bolmaǵan.
QJShKKA dırektorynyń orynbasary Ermek Jeldibaevtyń aıtýynsha, kishkentaı naýqastyń ómirin aman alyp qalý barysynda ujym tyǵyryqqa tirelgen.
Eresekter aýrýhanasynda balalarǵa arnalǵan bronhoskoptyń bolmaýyna baılanysty, oǵan bronhoskopııa jasaý múmkin emes edi.
Alaıda balanyń jaǵdaıy nasharlap, satýratsııasy tómendep, kógere bastaǵan soń reanımatologtar Nurlan Rsalıev, Mamyrjan ıÝldashev jáne hırýrg Baqtııar Galıev shuǵyl túrde ıntýbatsııa jasady.
Intýbatsııa kezinde balanyń tynys joldary ashylyp, osydan keıin ǵana balalar aýrýhanasynan dárigerler jetkenshe onyń jaǵdaıyn turaqtandyrýǵa múmkindik týdy.
BShMKKO mamandary kelgennen keıin bronhoskopııanyń kómegimen balanyń tynys jolyna turyp qalǵan burshaq alyndy.
Kishkentaı ǵana patsıenttiń jaǵdaıy QJShKKA jansaqtaý bóliminde birneshe saǵattan soń qalpyna kele bastaǵannan keıin, odan ári qaraı emdeý úshin Balalar shuǵyl medıtsınalyq kómek kórsetý ortalyǵyna jetkizildi.
«Burshaqty shyǵaryp alý ońaı emes, bul negizinen bronhoskopııa kómegimen jasalady. Balalar aýrýhanasynyń mamandary kelgenge deıin bizdiń dárigerler der kezinde áreket jasap, oǵan qosa Balalar aýrýhanasynyń dárigerleriniń „eresekter“ aýrýhanasy jaǵdaıynda kásibı túrde jasalǵan bronhoskopııanyń arqasynda bala aman qaldy. Bárimiz sábıge alańdap, onyń jaǵdaıyn jiti qadaǵalap otyrdyq, qazir úıge shyǵarylǵanyn estip qýanyp jatyrmyz», - deıdi dáriger Ermek Jeldibaev.
Balalar aýrýhanasy qabyldaý bóliminiń meńgerýshisi Meıirjan Qurmanalıev mundaı eresek jáne balalar aýrýhanasy mamandary shuǵyl túrde naýqasty qosyla qutqaratyn oqıǵalar jylyna 2-3 ret qaıtalanatynyn aıtady.
«Qabyldaý bólimine 103-ten "Naýqas 2 jasta, aspıratsııalyq sındrom, reanımatsııalyq brıgadany daıyndańyz“ dep qońyraý shaldy. Qabyldaý bóliminde 7 mamannan turatyn brıgada kútip otyrǵan. Shamamen 30 mınýt ótti, balany áli jetkizbedi: „Bizge jetkizýge ýaqyty bolmady ma?!“, „Bala aman ba?“ degen suraqtar týyndady. 103-ke ózimiz qońyraý shaldyq, olar naýqasty jaqyn mańdaǵy basqa aýrýhanaǵa aparýdy uıǵarǵan eken, ýaqyt bolsa ótip jatty. Komanda tez jınalyp, 15 mınýt ishinde álgi aýrýhanaǵa jetti. Kelgennen keıin bizdiń top bronhoskopııa jasap, tynys alý joldarynan burshaqty shyǵaryp tastady. Eki aýrýhananyń jedel áreketiniń arqasynda sábı aman qaldy», - deıdi Balalar shuǵyl medıtsınalyq kómek kórsetý ortalyǵynyń bólim meńgerýshisi Meıirjan Qurmanalıev.
Aýrýhana dárigerleri tek bıylǵy bir jarym aıdyń ishinde tynys joldarynda bógde zat bar 10 naýqasty aman alyp qalǵan.
Bul patsıentterdiń bári — 1 men 3 jas aralyǵyndaǵy balalar.
