Aýrýhanaǵa túsken patsıentterdiń týystaryn habardar etýdiń biryńǵaı arnasy qurylady
ASTANA. KAZINFORM – Aýrýhanaǵa túsken patsıentterdiń týystaryn habardar etýdiń biryńǵaı arnasy qurylady. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
– Patsıentterdiń jaqyn týystaryna aýrýhanaǵa jatqyzý mártebesi týraly ýaqtyly jáne durys habar berý – densaýlyq saqtaý júıesiniń ashyqtyǵyn arttyrýdyń, janjal jaǵdaılaryn azaıtýdyń jáne azamattardyń medıtsınalyq kómekke degen senimin qamtamasyz etýdiń mańyzdy elementi. Búginde medıtsınalyq aqparattyq júıelerde patsıentter men olardyń zańdy ókilderin kórsetiletin medıtsınalyq qyzmetter, arýhanaǵa jatqyzý faktileri, taǵaıyndalǵan tekserýler men rásimder týraly habardar etýdiń jekelegen elementteri iske asyrýda. Atap aıtqanda, «Damumed» mobıldi qosymshasynda emdeýshi dárigerdiń bastamasy boıynsha jansaqtaý bóliminde jatqan patsıenttiń týystaryna onyń densaýlyq jaǵdaıy týraly habarlama jiberý fýnktsııasy engizilgen, - dedi Úkimet basshysy.
Onyń aıtýynsha, Densaýlyq saqtaý mınıstrligi medıtsınalyq aqparattyq júıelerdi ázirleýshilermen jáne múddeli memlekettik organdarmen birlesip, patsıentterdiń týystaryn habardar etýdiń ortalyqtandyrylǵan servısin engizý boıynsha pılottyq jobany iske asyrý máselesin qarastyryp jatyr.
Atalǵan joba:
– patsıentterdiń týystaryn arýhanaǵa jatqyzý mártebesi (bólimshede, reanımatsııada, otada bolýy, basqa bólimshege aýystyrylýy jáne t.b.) týraly habardar etýdiń biryńǵaı arnasyn qurýdy;
– memlekettik aqparattyq júıeler men tsıfrlyq sáıkestendirý quraldaryn paıdalana otyryp, ótinish berýshini sáıkestendirý jáne onyń ókilettikterin rastaý tetikterin qamtamasyz etýdi;
– servısti medıtsınalyq aqparattyq júıelermen biriktirý, ótinishterdi tirkeý jáne aqparatqa qoljetimdilikti shekteýdi;
– medıtsınalyq uıymdardyń patsıentterdiń týystarymen baılanys jasaýyna arnalǵan biryńǵaı reglamentter men standarttardy ázirleýdi kózdeıdi.
– Pılottyq jobany jekelegen óńirdiń medıtsınalyq uıymdary bazasynda (Astana qalasy men Almaty oblysynyń ákimdikteri pılottyq jobaǵa qatysýǵa daıyn ekendigin bildirdi) iske asyrý josparlanyp otyr. Keıin nátıjeleri baǵalanyp, respýblıka deńgeıinde keńinen engiziletin bolady. Patsıentterdiń týystaryn habardar etýdiń júıeli jáne tehnologııalyq turǵydan qamtamasyz etilgen tetigin engizý medıtsına qyzmetkerlerine túsetin júktemeni azaıtýǵa, janjal jaǵdaılaryn barynsha tómendetýge, sondaı-aq dárigerlik qupııa men jeke derekterdi qorǵaý salasyndaǵy zańnama talaptarynyń saqtalýyn qamtamasyz etýge múmkindik beredi, - dedi Oljas Bektenov.
Buǵan deıin Qalqan platformasy arqyly medıtsınalyq qyzmet sapasy men qarjylandyrý barysy tolyq baqylaýǵa alynatynyn jazǵan edik.
