Aýrýhanadan haıýanattar baǵyna deıin: Japonııada balalar vırtýaldy saıahattady
ASTANA. KAZINFORM — Japonııada uzaq ýaqyt aýrýhanada em qabyldaıtyn balalar jańa tehnologııanyń kómegimen haıýanattar baǵy men basqa da oryndarǵa vırtýaldy saıahat jasaı alady. Bul týraly Kyodo agenttigi habarlady.
Bul bastamaǵa eldegi 30-dan astam aýrýhana qatysyp otyr. Joba qaterli isik jáne basqa da aýyr dertterden emdelip jatqan balalar, jasóspirimder men jastarǵa arnalǵan. Negizgi maqsat — aýrýhanadan shyǵa almaıtyn naýqastardyń oqshaýlaný sezimin azaıtyp, ózgelermen aralasýyna múmkindik berý jáne emdelý kezinde kóńilin sergitý.
Shilde aıynda Okaıama ýnıversıteti janyndaǵy aýrýhananyń pedıatrııa bóliminde 4-16 jas aralyǵyndaǵy 15 bala VR kózildirigin taǵyp, Osakadaǵy Tennodzı haıýanattar baǵyna vırtýaldy saıahat jasady. Balalar metavers keńistiginde afrıkalyq savannany aralap, jıraftar men zebralardy tamashalady.
Qatysýshylar vırtýaldy keńistikte avatarlaryn ózderi basqaryp, bir-birine chat arqyly habarlama jáne reaktsııalar jibere aldy. Jobaǵa Japonııanyń ár óńirindegi medıtsınalyq mekemelerden 100-ge jýyq naýqas qatysty.
Aýrýhanada naýryz aıynan beri jatqan 10 jastaǵy Takero Kývahara vırtýaldy saıahattyń ózine jaqsy áser etkenin aıtty.
— Janýarlardan qorqatynmyn. Biraq olardy vırtýaldy shyndyq arqyly esh alańdamaı tamashalaı aldym. Bul maǵan oıyn-saýyq saıabaǵy sııaqty túrli jerlerge barǵym keletinin sezdirdi, — dedi ol.
Okaıama ýnıversıtetiniń professory Djo Haseıdiń aıtýynsha, bul bastama uzaq ýaqyt em qabyldaıtyn balalardyń jalǵyzdyq sezimin azaıtady.
— Bul joba balalardyń emdelýge oń kózqaraspen qaraýyna kómektesip, «aýrýhanadan shyqqan soń Tennodzı haıýanattar baǵyna mindetti túrde baramyn» degen oı qalyptastyrsa deımin, — dedi professor.
Joba uıymdastyrýshylary aldaǵy ýaqytta haıýanattar baǵynan bólek, basqa da vırtýaldy oryndardy qosýdy josparlap otyr. Mamandar aýrýhanada jatqan naýqastarǵa qalaǵan jerlerine vırtýaldy túrde saıahattaýǵa múmkindik beretin orta qalyptastyrmaq.
Eske sala keteıik, elimizde «E-Museum» vırtýaldy veb-portaly mýzeı eksponattaryn onlaın tamashalaýǵa múmkindik beredi.
