Aýrýhanada jatqan balasynyń taıaq jegenin aıtqan aqtóbelik polıtsııaǵa shaǵym túsirdi
AQTÓBE. KAZINFORM – Erekshe balalardyń anasy Aksana Ýrazbekova em alý úshin aýrýhanaǵa jatqan balasynyń soqqyǵy jyǵylǵanyn aıtyp, shaǵym túsirdi. Ol ózine zańgerlik kómek beretin mamandardy izdep jatyr.
Aqtóbe qalasynyń turǵyny Aksana Ýrazbekova eki erekshe balany tárbıelep otyr. 10 jastaǵy balasyna ІІ top múgedektigin rásimdegen. Ol úıde otyryp bilim alady. Arnaıy esepte turatyn uly qarasha aıynda aýyryp, Aqtóbe oblystyq kópsalaly balalar aýrýhanasynyń nevrologııa bólimine túsedi. Sol jerde ol ózi qatarly balalarmen birge jatyp, olar ulyn uryp-soqqanyn aıtty.
- Balamdy tórt kún boıy urǵan. Onyń janynda bolǵan úsh balanyń biri estııar. Judyryǵymen basynan urǵan. Sol kezde onyń basy aınalyp, qulaǵy shýlap ketken. Qorǵanyp jatqanda edenge qulap, ony turǵyzbaı, tepkilegen. Ulym ishin ustap, búktetilip jatqan eken. Tamaǵyn da tartyp jegen. Munyń bári maǵan aýyr tıdi. Qazir balam dene jaraqatyn aldy ári qorqyp qalǵan. Ol mundaı ozbyrlyqty kórmegen, meıirimge bólenip ósken. Quqyq qorǵaý organdary osy derekti tirkep, tergeý júrgizý úshin Zaýyt polıtsııa bólimine baryp, aryz túsirdim. Endi maǵan zańgerlerdiń kómegi kerek,- dedi Aksana Ýrazbekova.
Psıholog balamen sóılesip, mán-jaımen qanyqqan. Bul otbasy hırýrgtiń kelýin kútip otyr.
- Balam qatty qorqyp qalǵan. Áli kúnge deıin soqqy alǵan jeri aýyrady. Ózim de qatty kúızeliske tústim. Aldaǵy kúnderi qandaı da bir keri áseri bola ma dep ýaıymdaımyn. Al ulym óte sabyrly, meıirimdi,- dedi anasy.
Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, naýqastanyp kelgen balaǵa em-dom júrgizilgen, dárigerler baqylaýynda bolǵan. Alaıda bir palatada jatqan balalar ózara sózge kelip qalǵan.
- Bir palatada bolǵan 10, 11 jáne 12 jastaǵy balalar uıaly telefon arqyly oıyn oınap, ózara sóz talastyrady. Balalardyń daýysyn estigen kezekshi medbıke olardyń qatty sóz aıtyp, bir-birin ıterip jatqanyn kóredi. Sol kezde ajyratyp, árqaısysyn bólek palataǵa aýystyrady. Sol kúni keshke em alyp jatqan balanyń anasy shaǵym aıtyp, keıin polıtsııa shaqyrdy. Aryz jazyp, balasyn alyp ketti. Kezekshi dáriger sol kezde balany qarady. Densaýlyǵyna esh shaǵym aıtpady. Ol kezde denesinde kógergeni iz bolmady. Bir kúnnen soń oblystyq densaýlyq saqtaý basqarmasynyń shtattan tys klınıkalyq psıhologi baryp, balanyń kóńil-kúıin bildi. Anasymen de sóılesti. Medıtsına qyzmetkerlerine esh shaǵym aıtpady,- dep habarlady oblystyq densaýlyq saqtaý basqarmasy.
Al oblystyq polıtsııa departamenti shaǵym boıynsha taraptardy tyńdaıdy.
Aıta keteıik, elimizde erekshe balalardy qoldaý týraly zań jobasy ázirlenip jatyr. Qazaqstanda ınklıýzıvti bilim berý jáne psıhologııalyq-pedagogıkalyq qoldaý 90 paıyzǵa artty.