Aýrýhana sektoryn halyqtyń qajettiligine qaraı damytý qajet - sarapshy
ASTANA. 2 tamyz. QazAqparat - «100 mektep, 100 aýrýhana» baǵdarlamasynyń aıasynda aýrýhana sektoryn damytý isi halyqtyń qajettiligine sáıkes júrgizilýi kerek, dep habarlady «Qazaqstan Respýblıkasynda aýrýhana sektoryn damytý strategııasy» jobasynyń jetekshisi Djeıms Tserkone pm.kz saıtyna bergen suhbatynda.
«Biz QR Densaýlyq mınıstrligine halyqtyń búgingi qajettiligine ǵana emes, bolashaqtaǵy yqtımal qajettilikke de negizdelgen aýrýhana sektoryn damytýdyń ınvestıtsııalyq strategııasyn ázirleýge kómektesýdemiz», - dedi joba jetekshisi, Sanıgest Internatsıonal» konsaltıngilik kompanııasynyń prezıdenti Djeıms Tserkone.
Aıta ketý kerek, sońǵy jyldary Qazaqstan «100 mektep, 100 aýrýhana» ınvestıtsııalyq baǵdarlamasynyń aıasynda aýrýhana sektoryn damytýda. Baǵdarlamanyń basty maqsaty Qazaqstandaǵy ambýlatorlyq emdeýdiń standarttaryn halyqaralyq deńgeıge deıin kóterý bolyp tabylady.
«QR Densaýlyq saqtaý mınıstrliginiń paıymdaýynsha, keleshekte túrli aýrýlarmen aýyratyn qart adamdar kóp bolady. Olarǵa emhanaǵa jatqyzýdyń qazirgi júıesinen basqasha emdeý júıesi kerek bolady, sondyqtan qazirden bastap ınfektsııalyq aýrýhanalarǵa degen qajettilik azaıady, esesine onkologııalyq kómekke degen qoljetimdilikti keńeıtý qajet»,- dedi Djeıms Tserkone.
Sonymen qatar sarapshy, medıtsına qyzmetkerleriniń jeke jaýapkershiligin arttyrýǵa, sondaı-aq eńbek resýrstarynyń tıimdiligin kóterýge baǵyttalǵan QR Elbasynyń «Qazaqstannyń áleýmettik jańartylýy: Jalpyǵa ortaq Eńbek qoǵamyna jıyrma qadam» baǵdarlamalyq maqalasy mańyzdy bastama ekenin atap ótti.
«Densaýlyq saqtaý júıesin keshendi reformalaý - áleýmettik jańartýdyń ajyramas bólshegi jáne ol árbir azamattyń óz densaýlyǵy úshin jaýapty ekendiginiń kepili. Bul shara eńbek ónimdiligin arttyrýǵa sep bolady jáne jalpy alǵanda elimizdiń ekonomıkalyq damýyna úles qosady»,- dep túıindedi óz sózin Djeıms Tserkone.
Dúnıejúzilik qaıta qurý jáne damý bankiniń «Tehnologııalar berý jáne Qazaqstan Respýblıkasynyń densaýlyq saqtaý sektorynda ınstıtýtsıonaldyq reformalar júrgizý» atty jobasynyń aıasynda QR Densaýlyq saqtaý mınıstrligi halyqaralyq konsaltıngilik kompanııasymen birlesip halyqaralyq standarttarǵa sáıkes 2020 jylǵa deıingi kezeńde aýrýhana sektoryn damytý strategııasynyń (medıtsınalyq kómek kórsetýdiń deńgeıleri boıynsha) jobasyn iske asyrýda.
