Aýrýhana qyzmetkerleri jappaı tártipsizdik kezinde táýlik boıy operatsııa jasady - Almaty
Kezdesýge bas dárigerdiń orynbasarlary, bólim meńgerýshileri, aǵa medbıkeler qatysty. Áńgime barysynda olar medıtsınalyq kómek kórsetý boıynsha júrgizilip jatqan jumystar týraly aıtyp, damý perspektıvalary jóninde pikirlerimen bólisti.
Qala ákimi barlyq dárigerler men medıtsına qyzmetkerlerine kórsetken batyldyǵy úshin alǵys bildirdi.
4-10 qańtar aralyǵynda aýrýhananyń qabyldaý bólimine túrli jaraqatpen – oq tıgen, soqqyǵa jyǵylǵandar kóptep tústi. Emdeý mekemesine barlyǵy 305 adam júgindi. Aýrýhananyń barlyq 9 operatsııalyq bólimi táýlik boıy jáne úzdiksiz jumys istedi, 259 operatsııa jasaldy.
Quramynda travmatolog-dárigerler, hırýrgter, neırohırýrgter, anestezıolog-reanımatologtar, medbıkeler jáne basqa da mamandar bar 6 brıgada kúsheıtilgen rejımde jumys istedi.
Aýyr jaraqat alǵandar shuǵyl túrde operatsııalyq blokqa jiberildi, ortasha aýyrlyqtaǵy patsıentter bólimshelerge jatqyzyldy, jeńil jaraqat alǵandar tekserilip, tańylyp, ambýlatorııalyq emdeýge úılerine jiberildi.
«Óte qaýipti jaǵdaıǵa qaramastan, aýrýhana qyzmetkerleri naǵyz erlik pen shynaıy patrıotızmdi kórsetti, ózderiniń kásibı boryshyn batyl oryndady», - dep atap ótti Baqytjan Saǵyntaev.
Tótenshe jaǵdaı kezinde jumys istegen 430 qyzmetker materıaldyq kómek alady.
Aýrýhananyń materıaldyq-tehnıkalyq bazasyn odan ári damytý maqsatynda qala ákimi Qoǵamdyq densaýlyq basqarmasyna qajetti medıtsınalyq jabdyqtar men jedel járdem kólikterin satyp alýǵa ótinim daıyndaýdy tapsyrdy.
Densaýlyq saqtaý mekemelerin modernızatsııalaýdyń úsh jyldyq baǵdarlamasy aıasynda lıftilerdi arnaıy medıtsınalyq lıftilerge aýystyrýdy qarastyrý qajet.
Búginde aýrýhananyń qyzmeti Almaty qalasynyń jáne búkil Qazaqstannyń turǵyndaryna joǵary bilikti shuǵyl jáne josparly medıtsınalyq kómek kórsetýge baǵyttalǵan. Statsıonar 320 orynǵa eseptelgen. Aýrýhanada jetekshi medıtsınalyq joǵary oqý oryndarynyń kafedralary ornalasqan.
2021 jyly klınıka aýyr jáne óte aýyr dárejeli COVID-19 patsıentterin qabyldaı otyryp, І eshelondaǵy juqpaly aýrýlar aýrýhanasy retinde 5 aı jumys istedi. Barlyǵy KVI -den 3789 patsıent emdeldi.
Almaty ákimdiginiń arqasynda aýrýhana ortalyqtandyrylǵan ottegi stantsııasymen qamtamasyz etilgen. «B» jáne «V» klasyndaǵy medıtsınalyq qaldyqtardy zalalsyzdandyrý boıynsha tez qurylatyn modýldik keshender salyndy.
Búginde aýrýhana 100% medıtsınalyq gazdarmen qamtamasyz etilgen jáne ár palatada ottegi konsolderi ornatylǵan.
