Aýrýhana qarjysyna páter alǵan: Túrkistanda bas dáriger tergeýge alyndy
ASTANA. KAZINFORM — QMA Túrkistan oblysy boıynsha departamenti medıtsınalyq jabdyqtardy satyp alý kezinde bıýdjet qarajatyn jymqyrý faktisi boıynsha tergeý júrgizip jatyr.
Qazyǵurt aýdandyq ortalyq aýrýhanasynyń burynǵy bas dárigeri medıtsınalyq gazben jabdyqtaý júıesine arnalǵan qurylǵylardy satyp alý kezinde zańsyz shema uıymdastyrǵany anyqtaldy. Tergeý málimetteri boıynsha, ol satyp alýdy jasandy túrde birneshe bólikke bólip, keıin kóptegen kelisimsharttar jasaý arqyly memlekettik qarajatty jymqyrýǵa jaǵdaı jasaǵan.
Shemany iske asyrý úshin kúdikti medıtsınalyq jabdyqtardy jetkizý salasynda tájirıbesi bar tanysyn tartqan. Ol ózine baǵynysty, týystary men tanystarynyń atyna tirkelgen kommertsııalyq uıymdardy paıdalanǵan. Osy fırmalar atynan baǵasy negizsiz kóterilgen kommertsııalyq usynystar ázirlengen.
Tergeý derekterine sáıkes, jabdyqty is júzinde basqa kompanııa jetkizgenimen, barlyq qabyldaý aktileri men kelisimsharttar kúdiktiler baqylaýyndaǵy fırmalar arqyly rásimdelgen. Aýrýhana qarajaty atalǵan kompanııalardyń esepshottaryna túskennen keıin kúdiktiler qarajatty qolma-qol aqshaǵa aınaldyryp, ózara bólisken.
— Memleketke keltirilgen shyǵyn 115 mln teńgeni qurady. Qylmystyq jolmen alynǵan tabysty jasyrý maqsatynda burynǵy bas dáriger elordadan eki bólmeli páter satyp alǵan. Sot sanktsııasymen atalǵan múlikke tyıym salyndy. Qazirgi tańda burynǵy bas dárigerge qatysty bultartpaý sharasy retinde kepil qoldanylsa, onyń sybaılasy úı qamaqqa alynǵan. Qylmystyq-protsessýaldyq kodekstiń 201-babyna sáıkes ózge aqparat jarııa etýge jatpaıdy, — delingen habarlamada.
Budan buryn «Jezqazǵan-Eır» AQ-ǵa qatysty antımonopolııalyq tergeý materıaldary QMA-ǵa joldanatynyn jazǵanbyz.