Aýrýhana basshylyǵy koronavırýspen kúresken dárigerlerge bólingen aqshany qaltasyna basqan

NUR-SULTAN. QazAqparat - Jambyl oblysy Jýaly ortalyq aýdandyq aýrýhanasynyń laýazymdy tulǵalaryna qatysty aqsha ıemdený faktisi boıynsha sotqa deıingi tergeý bastaldy. Bul týraly QR Sybaılas jemqorlyqqa qarsy is-qımyl agenttigi 1-shi departamentiniń aǵa tergeýshisi Qaısar Barjaqsynov aıtty, dep habarlaıdy QazAqparat tilshisi.

«Jambyl oblystyq sybaılas jemqorlyqqa qarsy qyzmeti medıtsına qyzmetkerleriniń shaǵymy boıynsha Jýaly aýdandyq ortalyq aýrýhanasynyń laýazymdy tulǵalaryna qatysty sotqa deıingi tergeý bastady», - dedi ol agenttiktiń baspasóz qyzmeti alańynda ótken brıfıng barysynda.

Onyń atap ótýinshe, tergeý COVID-19 pandemııasy jaǵdaıynda epıdemııaǵa qarsy sharalar úshin osyǵan deıin eńbekaqyǵa aýdarylǵan qosymsha ústemaqydan aqsha ıemdený faktisi boıynsha júrgizilip jatyr.

«QR Qylmystyq is júrgizý kodesiniń 201-babyna sáıkes tergeý múddesi úshin ózge aqparat jarııalanbaıdy», - dedi Qaısar Barjaqsynov.