Aýrýdyń aldyn alý boıynsha júrgizilgen túsindirý jumystaryna qaramastan, aýrýǵa shaldyqqandar medıtsınalyq kómekke kesh júginedi

Bul týraly búgin QR Densaýlyq saqtaý mınıstrligi Memlekettik sanıtarlyq-epıdemıologııalyq qadaǵalaý komıtetiniń tóraǵasy Keńes Ospanov BAQ ókilderimen bolǵan baspasóz máslıhaty barysynda málim etti.

Onyń atap ótýinshe, Ońtústik Qazaqstan oblysynyń Ordabasy aýdanynda kene shaqqan azamat 6 kún boıy dárigerge kórinbegen. «Demek, biz qanshama qyrýar jumystar atqarǵanymyzben, kóptegen azamattar ózderiniń densaýlyqtaryna salǵyrt qarap, medıtsınalyq kómekke kesh júginedi», deıdi ol.

K.Ospanovtyń keltirgen derekterine sáıkes, aǵymdaǵy jyly kongo-qyrym qandy bezgegine qatysty 11 oqıǵa tirkelse, onyń 10-y OQO-ǵa, al 1-eýi Qyzylorda oblysyna tıesili. Aýrýlardyń 3-eýi qaza tapqan. Al bıylǵy 4 aıdyń ishinde respýblıka boıynsha kene shaqqan 8155 adam medıtsınalyq kómekke júginse, onyń 7777-si OQO-da, 331-i Qyzylorda oblysynda, al 47-si Jambyl oblysynda oryn alǵan.

Densaýlyq mınıstrliginiń mamandary ınfektsııanyń taralýyna jol bermeý, ári aýrýǵa shaldyqqan kenelerdiń taralý aýmaǵyn anyqtaý maqsatynda 34 myńnan astam jándikti jınap, zerttegen. Sonymen qatar 979 eldi mekende keneniń taralýyna qarsy aldyn ala is-sharalar júrgizilip, 12 mln. sharshy metr jer óńdelgen. Turǵyndar arasynda túsindirý jumystaryn júrgizý úshin halyqaralyq uıymdardyń qoldaýymen Ońtústik Qazaqstan, Qyzylorda, Jambyl oblystarynda KQQB-nyń aldyn alýǵa keńes beretin 13480 kitapsha taratylǵan.