Aýrýdyń bárin ekologııamen baılanystyrýǵa bolmaıdy — Nurlybek Nálibaev

Qyzylorda oblysyndaǵy aýrýdyń bárin ekologııamen baılanystyrýǵa bolmaıdy. Bul týraly «Jibek Joly» telearnasynyń «Ýáde» baǵdarlamasyna suhbat bergen Qyzylorda oblysynyń ákimi Nurlybek Nálibaev aıtty, dep habarlaıdy Kazinform.

«Óńir turǵyndary ekologııalyq koeffıtsıent alady. Jalaqyǵa 30 paıyz ústemaqy qosylady. Ol da úlken jeńildik. Negizi aýrýdyń bárin ekologııamen baılanystyra berýge bolmaıdy. Ondaı aýrýlar basqa óńirlerde de bar. Ekologııaǵa baılanysty emes. Mysaly, bizde bıyl ana ólimi joq. Burnaǵy jyldary bolǵan. Ekologııaǵa baılanysty bolsa, onda jylda qaıtalanar edi ǵoı. Shynyn aıtý kerek, qyzmetterdiń de áserinen bolýy múmkin. Endi onyń bárin ekologııaǵa jaba bergen durys emes. Árıne,belgili bir deńgeıde ekologııanyń keri áseri bar. Biraq, ony basym dep aıtýǵa kelmeıdi», — dedi óńir basshysy.

Onyń atap ótýinshe, buryn óńirde ekologııaǵa qatysty baǵdarlama bolǵan. Búginde ol ózektiligin joıdy. Sondyqtan óńir aldaǵy ýaqytta Ekologııa mıınstrligimen birlesip, jańa baǵdarlama ázirleýge nıetti. 

«Nysanbaev myrzamen (Ekologııa jáne tabıǵı resýrstar mınıstri Erlan Nysanbaev) bul baǵytta sóılestik. Jaqyn arada óńirimizge keledi. Birge otyryp, ekologııa máselesi boıynsha jumys isteımiz. Mamandarymyz da pikir almasyp, jumys isteýde», — dedi Qyzylorda oblysynyń ákimi.