Aýrý jasaryp barady: Óskemende dárigerler ınsýlt alǵan 19 jastaǵy qyzdy aman alyp qaldy

ÓSKEMEN. KAZINFORM — Shyǵys Qazaqstan oblystyq arnaıy medıtsınalyq ortalyq dárigerleri ınsýlt alǵan 19 jastaǵy qyzǵa sátti tromboekstraktsııa jasap, ajaldan arashalap qaldy. 

Qyzdy aýrýhanaǵa jedel járdem jetkizgen. Patsıentten bas aınalý, qusý, aıaq-qoly álsireý, bet bulshyqetteriniń asımmetrııasy jáne sóıleý qabiletiniń buzylýy belgileri baıqaldy. Tekserý kezinde sol jaq ortańǵy mı arterııasynyń bitelýi (okklıýzııa) anyqtaldy.

Naýqasqa tromboekstraktsııa jasaldy. Bul arterııa ishindegi trombty alyp tastaý arqyly qan aınalymyn qalpyna keltiretin, ıshemııalyq ınsýlttiń aýyr saldaryn boldyrmaýǵa múmkindik beretin protsedýra.

— Dárigerlerdiń jedel áreketteri men zamanaýı qural-jabdyqtyń arqasynda birneshe saǵat ishinde naýqastyń jaǵdaıy ońala bastady. Qazir qyz ózin jaqsy sezinedi, jaǵdaıy qanaǵattanarlyq. Ol ınsýlt bóliminen úıine shyǵaryldy, — dep habarlady ShQO arnaıy medıtsınalyq ortalyqtan.

Dárigerlerdiń aıtýynsha, 40 jasqa deıin ınsýlt alatyndar az. Al 20 jasqa deıingiler arasynda múlde sırek kezdesedi.

Eske salsaq, osyǵan deıin jasóspirimder arasynda vıtılıgo aýrýy kóbeıgeni jaıly jazǵanbyz.