Aýrý mal úshin Avstrııamen sottasamyz - A.Mamytbekov

ASTANA. 20 aqpan. QazAqparat - Avstrııadan ákelingen aýrý iri qara mal úshin Qazaqstan osy elmen sottasýy yqtımal.

Bul týraly Qazaqstan Fermerleri odaǵynyń keńeıtilgen májilisinen keıin jýrnalısterge suhbat bergen QR Aýyl sharýashylyǵy mınıstri Asyljan Mamytbekov málim etti.

«Eger Avstrııa jaǵy búgingi shyǵyndy ótemeıtin bolsa, onda biz olarmen sottasatyn bolamyz. Kelisimge sáıkes, bul máselemen qazaqstandyq sot aınalysady. Negizi, kez kelgen sharýashylyq daý-damaı qaralǵan kezde, tek negizgi soma ǵana emes, onymen qatar basqa da shyǵyndar óteledi. Taýardan túsetin paıda, maldy ustaýǵa ketken shyǵyn - osynyń barlyǵy sot aryzyna kirýi múmkin», - deıdi A.Mamytbekov. Mınıstr atap kórsetkendeı, aýrý maldy joıý týraly sheshim ózgermeıdi.