Aýrý kıikten maldy aman saqtap qalýdyń amalyn jasaý kerek – ǵalym
ORAL. KAZINFORM – Batys Qazaqstan oblysy Jánibek aýdany Borsy aýyly mańynda aýrý kıik beınetaspaǵa tústi.
Jergilikti turǵynnyń málim etkenindeı, beınejazba 18 sáýir kúni túsirilgen.
– Kıik alǵy jáne artqy aıaǵynan aqsaıdy. Aýzynan qan aralas kóbik aǵyp tur. Adamdar jaqyndaǵan kezde eshqandaı qozǵalys joq, júrmeıdi, - deıdi turǵyn.
Osyǵan oraı Batys Qazaqstan ınnovatsııalyq-tehnologııalyq ýnıversıtetiniń professory, veterınarııa ǵylymdarynyń doktory Ǵaısa Ábsatırov óz pikir-paıymyn bildirdi.
Onyń sózine qaraǵanda, fermerler, qosalqy sharýashylyq ıeleri asa saq bolyp, tórt túlik maldy aman saqtap qalýdyń amaldaryn jasaýy kerek.
– Kórshiles Astrahan jáne Atyraý oblysynda qystaǵan kıikter qaıtyp kelip jatyr. Aýsyl – juqpaly aýrý. Kúnine 70-80 shaqyrym júretin aqbókender osylaı aýyrǵan jaǵdaıda jaıylymdy da, shabyndyqty da búldiredi. Aýyrǵan kıikterdi rezervat aýmaǵynda oqshaýlap, joıý sharalaryn alý kerek. Ekinshiden, maldy egý qajet. Veterınar mamandar qandaı vaktsına tıimdi, soǵan monıtorıng jasaǵan jón. Budan eki jyl buryn kıikterdi óndiristik turǵyda shekteý sharalary qolǵa alynbasa, tabıǵı indetke urynýy múmkin ekendigin aıtqanmyn. Bıyl kıikten kóp shyǵyn bolatyn túri bar, - dedi ǵalym.
Jánibek aýdany ákiminiń orynbasary Mırbolat Bısenov atalmysh derek týraly BQO orman sharýashylyǵy jáne janýarlar dúnıesi aýmaqtyq ınspektsııasyna jáne «Ohotzooprom» ÓB» RMQK óńirlik fılıalyna habarlanǵanyn jetkizdi.
– Aldaǵy aptada mamandar keledi dep kútip otyrmyz, - dedi M.Bısenov.
Eske sala keteıik, budan buryn Batys Qazaqstanda kıikterdiń aýrý taratyp jatqany ras pa, sony jazǵan bolatynbyz.
