Aýmaqtyq qorǵanys áskerleriniń mindetine ne kiredi
ASTANA. KAZINFORM — Elimizde Aýmaqtyq qorǵanys áskerleri 2017 jylǵy 13 maýsymda quryldy. Bastapqyda bul bólimsheler jergilikti atqarýshy organdardyń kommýnaldyq memlekettik mekemeleri retinde jumys istedi.
2018 jylǵy sáýirde ákimdikterdiń janyndaǵy aýmaqtyq qorǵanys quramalary elimizdiń Qarýly kúshteri aýmaqtyq áskerleriniń áskerı bólimderi bolyp qaıta jasaqtaldy. Sol jylǵy mamyrda Jaýyngerlik parad kezinde Memleket basshysy oblystar men respýblıkalyq mańyzy bar qalalardyń ákimderine quramalardyń jaýyngerlik týlaryn tabys etti.
Qorǵanys mınıstrliginiń málimetinshe, Aýmaqtyq qorǵanys áskerleri «Qazaqstan Respýblıkasynyń aýmaqtyq qorǵanysy týraly» Zańymen belgilengen aýmaqtyq qorǵanys mindetterin oryndaý maqsatynda qurylǵan. Tótenshe jaǵdaı bolǵan kezde olar aýmaqtaǵy asa mańyzdy nysandardy qorǵaıdy. Sonymen qatar, aýmaqtyq qorǵanys bólimderi elimizdegi tótenshe jaǵdaılar saldaryn joıýǵa belsene atsalysady.
— Máselen, aýmaqtyq qorǵanys kúshteri COVID-19 pandemııasy kezinde, sondaı-aq 2020 jyly Sardoba sý qoımasyndaǵy jarylys saldaryn joıýǵa, 2022 jyly Qostanaı oblysyndaǵy orman órtin sóndirýge, 2024 jyly elimizdiń soltústik-batys óńirlerinde bolǵan sý tasqynyn eńserýge jumyldyrylǵanyn atap ótken jón. Aýmaqtyq áskerlerdiń áskerı bólimderi qazirgi áskerı qyzmetshiler bolyp tabylatyn ofıtserler, serjanttar men sarbazdar qyzmet ótkeretin Qarýly Kúshterdiń quramdas bóligi sanalady. Áskerı bólimder sapynda qyzmetshiler sany týraly aqparat jabyq jáne taratýǵa jatpaıdy, — dedi vedomstvodan.
Aýmaqtyq áskerlerdiń qyzmeti Qazaqstan Respýblıkasynyń qorǵanys týraly zańnamasymen, sondaı-aq vedomstvolyq basshylyq qujattarymen reglamentteledi. Áskerler arnalýy boıynsha mindetterdi oryndaýdy qamtamasyz etetin daıyndyq dárejesinde ustalady. Olardy qamtamasyz etýdi Qorǵanys mınıstrligi men jergilikti atqarýshy organdar júzege asyrady. Jeke quram qajetti qarý-jaraqpen jáne áskerı tehnıkamen, sondaı-aq materıaldyq quraldar qorymen jabdyqtalǵan.
— Áskerlerdiń ázirligin arttyrý, sondaı-aq Qazaqstan Respýblıkasynyń azamattaryn memlekettiń qorǵanysy jónindegi mindetterdi oryndaýǵa daıarlaý maqsatynda turaqty negizde áskerı mindettilerdi shaqyrýmen oqý-jattyǵýlar ótkiziledi. Áskerge shaqyrylǵan azamattar oqý-jattyǵýlarda áskerı daıarlyqtan ótedi. Buryn áskerı qyzmet barysynda nemese oqý oryndarynda oqyǵan kezde alǵan daǵdylaryn qalpyna keltiredi jáne jetildiredi, — dedi Qorǵanys mınıstrliginen.
Aıta keteıik, keshe Aqordada Otan qorǵaýshy kúnine oraı merekelik is-shara ótti. Onda Memleket basshysy Qasym-Jomart Toqaev memlekettik marapat jáne áskerı shen tapsyryp, egemen elimiz Qarýly kúshterge zor senim artyp otyrǵanyna toqtaldy.
