«Aýmaqaralyq sottylyq»: Shymkenttegi sot isi Petropavlda nemese Oralda qaralýy múmkin
«Azamattyq protsess boıynsha «Sotqa deıingi hattamany engizý» jobasyn júzege asyramyz. Osy joba qoldanysqa engizilgen elderde kóptegen daýlar sotqa jetpeıdi. Óıtkeni taraptar sotqa deıin bir-birine barlyq dálelderdi ashyp kórsetýi tıis. Nátıjesinde azamattar sottasqan durys pa, burys pa, sheshim qabyldaıtyn bolady», - dedi spıker Ortalyq kommýnıkatsııalar qyzmetindegi baspasóz máslıhatynda.
Sot júıesindegi taǵy bir jańashyldyq – «Aýmaqaralyq sottylyq» dep atalady. Bul jobanyń maqsaty – qazirgideı isti bir óńir aıasynda emes, tutas respýblıka sheńberinde qarastyrý.
«Qazir sottarda kez kelgen isti sýdıalarǵa tóraǵa emes, IT-júıe kezdeısoq tásilmen bóledi. Bul – bizdiń jemqorlyqqa qarsy quralymyz. Biraq ol tek bir ǵana sottyń ishinde jumys isteıdi. Endi biz osy isterdi elimizdegi barlyq sottardyń arasynda olardyń mamandanýy boıynsha bólýdi usynamyz. Mysaly, talapker men jaýapker Shymkentten bolsa, olardyń aryzy Petropavlda nemese Oralda qaralady. Osylaısha isterdi qaraý kezindegi «barmaq basty, kóz qysty» áreket azaıyp, ádil sheshimder sany artady dep senemiz», - deıdi A. Sádýaqasov.
Al «Úlgili sheshim» resmı ókildiń aıtýynsha, uqsas máselelerde birizdi sheshim qabyldaýǵa kómektesedi.
«Ózderińiz bilesizder, sottarǵa uqsas aryzdar kóptep túsedi. Mysaly, lombard, turǵyn úı úleskerleri, áleýmettik ótemaqy alý, mysaly 42 500 teńge berilgen kezde osyndaı ister barlyq óńirde qaraldy. Biraq sottar túrli sheshim qabyldap, halyqtyń ashý-yzasyn týdyrdy. Osy olqylyqty boldyrmaý maqsatynda joǵary turǵan sot osyndaı isterdiń bireýin alyp, sheshim shyǵarady. Bul sheshim «Úlgili sheshim» dep tanylyp, basqa óńirlik sottar basshylyqqa alady. Munda sýdıanyń táýelsizdigi prıntsıpi saqtalady, kelispegen jaǵdaıda óziniń balamaly sheshimin de shyǵara alady», - dep túsindirdi A. Sádýaqasov.