Aýmaq, qaýipsizdik, tutqyndar: Máskeýdegi kelissózdiń astarynda ne jatyr
MÁSKEÝ. KAZINFORM – Kremlde Reseı prezıdenti Vladımır Pýtınniń AQSh prezıdentiniń arnaıy ókili Stıven Ýıtkoffpen jáne kásipker Djared Kýshnermen kezdesýi aıaqtaldy. Taraptar Abý-Dabıde ótken Reseı, AQSh jáne Ýkraına arasyndaǵy úshjaqty kelissózderdiń qorytyndylaryn, gýmanıtarlyq máselelerdi, aýmaqtyq retteýdi jáne aldaǵy dıalogtyń bolashaǵyn talqylady, dep habarlaıdy agenttiktiń menshikti tilshisi.
Kezdesýge Reseı tarapynan prezıdenttiń kómekshileri ıÝrıı Ýshakov pen Vladımır Medınskıı, sondaı-aq Reseıdiń Tikeleı ınvestıtsııalar qorynyń bas dırektory Kırıll Dmıtrıev qatysty.
Kelissózderdiń basynda Pýtın AQSh prezıdenti Donald Trampqa ýkraınalyq tarappen baılanys ornatýǵa yqpal etkeni úshin alǵys aıtty. Onyń atap ótýinshe, gýmanıtarlyq baǵytta belgili bir oń nátıjeler bar, atap aıtqanda, taraptar ustap otyrǵan adamdardy kezekti ret almasý jumystary daıyndalyp jatyr.
Óz kezeginde Ýıtkoff 10–11 qarashada Abý-Dabıde ótken kelissózderge oń baǵa berdi. Onyń aıtýynsha, Reseı men Ýkraına ókilderi bir ústel basynda otyryp, naqty máselelerdi talqylaǵan.
— Bizdiń baǵalaýymyzsha, kelissózder óte oń atmosferada ótti. Reseı men Ýkraına ókilderiniń eki taraptan da belsendi jumys istegenin baıqadyq. Delegatsııalar bir ústel basynda otyryp, naqty máselelerdi talqylap, olardy sheshý joldaryn qarastyrdy, — dedi AQSh prezıdentiniń arnaıy ókili.
Ol sondaı-aq eki el arasyndaǵy aýqymdy tutqyn almasý sharasyna daıyndyq júrip jatqanyn habarlap, ony osy ýaqytqa deıingi eń iri almasýlardyń biri dep atady.
— Meniń oıymsha, bul — qaqtyǵysty retteý baǵytynda ilgerileýshilikke qol jetkizip jatqanymyzdyń kórsetkishi, — dep atap ótti Ýıtkoff.
Óz kezeginde Pýtın Reseı men Ýkraına ombýdsmenderiniń qatysýymen gýmanıtarlyq yntymaqtastyqty jalǵastyrýdy usyndy.
Kezdesý barysynda aýmaqtyq máseleler men bolashaq qaýipsizdik arhıtektýrasy da talqylandy. Kýshner qaqtyǵysty aıaqtaý úshin taraptardyń áli de birqatar qadamdardy kelisýi qajet ekenin moıyndady.
Kýshnerdiń aıtýynsha, AQSh tarapy eýropalyq seriktesterimen Reseıdiń, Ýkraınanyń jáne Eýropa memleketteriniń múddelerin eskeretin yqtımal qaýipsizdik arhıtektýrasyn talqylap jatyr.
Kezdesýge qatysýshylar kelissózder úderisindegi Eýropanyń rólin de sóz etti. Ýıtkoff eýropalyq ókilderdiń Abý-Dabıde bolǵanyn, alaıda kelissózder ústeline tikeleı qatyspaǵanyn naqtylady. Sonymen birge AQSh tarapy olardy talqylaýlardyń barysy týraly habardar etip otyrǵan.
Pýtın Máskeýdiń eýropalyq memlekettermen dıalogtan bas tartpaǵanyn aıtyp, Vashıngtondy eýropalyq odaqtastarymen ortaq ustanymdy kelisýge yqpal etýge shaqyrdy.
Máskeýdegi kelissózderden keıin Ýıtkoff pen Kýshner Ýkraına prezıdenti Vladımır Zelenskıımen kezdesýdi josparlaıtyndaryn aıtqan. AQSh ókilderi oǵan Kremldegi talqylaýlardyń nátıjeleri týraly aqparat bermek.
Ýıtkoff aldaǵy ýaqytta úshjaqty formattaǵy kelesi kezdesýdi josparlaý týraly resmı túrde jarııalaýǵa múmkindik bolady degen úmit bildirdi.
Eske salaıyq, buǵan deıin amerıkalyq kelissóz júrgizýshiler Vladımır Pýtınmen kezdesý úshin Sankt-Peterbýrgke barǵany týraly habarlaǵan edik.
