Áýlıekóldegi órtten zardap shekken bızneske 36 mln teńgeden astam ótemaqy tólenedi

QOSTANAI. QazAqparat – Áýlıekól kásipkerleri órtten zardap shekken bıznes úshin ótemaqy alady, dep habarlaıdy QazAqparat tilshisi.

Óńirlik kásipkerler palatasynyń baspasóz qyzmetinen habarlanǵandaı, Áýlıekól aýdany kásipkerleriniń materıaldary búgin «Kúshimiz birlikte» qory komıssııasynyń otyrysynda qaraldy.

Qostanaı oblysynyń kásipkerler palatasy bıznes sýbektilerine órtten keltirilgen zalal týraly málimetterdi jınaý boıynsha úlken jumys atqardy.

«Jedel rejımde kásipkerlermen, palata jáne óńirlik keńes ókilderiniń qatysýymen kezdesýler ótkizildi. Onda kelgen zalaldy tirkeý algorıtmi jáne basqa mán-jaı túsindirildi. Nátıjesinde múliktik zalal kelgen bıznes sýbektileri anyqtaldy, keri baılanys ornatyldy, múlikti tekserý aktisi ázirlendi, nysandar foto jáne beınejazbaǵa túsirildi. Bul málimetter komıssııa otyrysyna usynyldy. Olar boıynsha búkil aqparat rastaldy», - dedi Danııar Kúzenbaev.

«Kúshimiz birlikte» qorynyń komıssııasy jeke kásipkerliktiń bes sýbektisine 36 mıllıon teńgeden astam shyǵyndy óteýdi qoldady.

Buǵan deıin Arhımed Muhambetov Áýlıekól aýdanynda órtten zardap shekkenderge arnalǵan úılerdiń aýqymdy qurylysy aıaqtalyp qalǵanyn habarlaǵan bolatyn.

Jaqyn arada turǵyndardy qonystandyrý bastalady.