Áýlıekóldegi aýlasyn sý basqan 12 úıdiń mańy qurǵatyldy - ákimdik

ASTANA. QazAqparat – Qostanaı oblysy Áýlıekól aýdanynda órtten keıin salynǵan 91 úıdiń 12-siniń káriz júıesi tolyp, aýlasyn sý basqan. Qazir ol jerler túgel qurǵatyldy. Bul týraly aýdan ákimi Erlan Temenov málim etti, dep habarlaıdy QazAqparat tilshisi.

«Birlik» shaǵyn aýdanyndaǵy paıdalanýǵa berilgen 91 úıdiń on ekisiniń aýlasyn sý basty. Ol baspanalardyń irgetastary barlyq talapqa saı, arnaıy standarttarmen jasalǵan. Sondyqtan, birde-bir úıdiń ishine sý kirgen joq. Sý alyp ketken aımaqtarda 6 arnaıy tehnıka jumys istep jatyr. Sonymen qatar, bul jumystarǵa 25 adam jumyldyryldy. Qazir barlyq aýlalar jınalǵan sýdan tazartyldy dep aıta alamyn», - dep málim etti aýdan ákimi Erlan Temenov.

Eske sala keteıik, buǵan deıin Qostanaı oblysynyń Áýlıekól aýdanynda orman órtinen zardap shekkender úshin salynǵan jańa úılerdiń turǵyndary aýlasyn sý alyp, septıkteriniń tolyp ketkenine shaǵymdanǵan bolatyn.

Bul máselege qatysty túsinikteme bergen oblystyq qurylys basqarmasynyń basshysy Berik Tańjaryqov birneshe kúnge sozylǵan jańbyr men qar saldarynan úılerdiń aýlasyna sý jınalǵanyn málimdegen edi.

Aıta ketsek, qyrkúıek aıynda Qostanaı oblysyna qarasty Áýlıekól aýdanynda orman órtengen edi. Birneshe kúnge jalǵasqan órt saldarynan 2 091 adam evakýatsııalanyp, 12 turǵyn túrli jaraqat aldy. Sonymen qatar, Amanqaraǵaı aýylynda 98 úı órtenip ketti.
Jýyrda órtten zardap shekkenderdiń jańa baspanaǵa kóship, qonystoıyn toılap jatqany jaıly vıdeo jarııalandy.

Foto: instagram.com/kostanay_news