Áýlıekóldegi alapat órt: Orman sharýashylyǵynyń eks-dırektory sot zalynan bosatyldy

ASTANA. QazAqparat – Qostanaı oblysynyń Áýlıekól aýdanynda bolǵan iri órtke qatysy bar dep aıyptalǵan «Basaman» orman sharýashylyǵynyń dırektory sot zalynan bosatyldy, dep habarlaıdy QazAqparat «Qostanaı jańalyqtary» basylymyna silteme jasap.

Aıyptaý aktisine sáıkes, 2020 jyl - 2022 jyldyń qyrkúıegi aralyǵynda orman sharýashylyǵynyń burynǵy dırektory Ashat Jaqashev laýazymyn paıdalanyp, jekemenshik ıelerine órt tutaný qaýpi joǵary kezeńde aǵashtardy ruqsat qujattarsyz kesýge múmkindik bergen. Sol úshin 15 mln teńge kóleminde syıaqy alǵan dep aıyptaldy.

Prokýror Ashat Jaqashevti 7 jylǵa bas bostandyǵynan aıyryp, zardap shekkenderdiń azamattyq aryzy boıynsha 21 mlrd teńge kóleminde ótemaqy talap etti.

Іsti qaraý kezinde sot qylmystyq is babyn aýystyrdy: Jaqashev isi sotqa QR Qylmystyq kodeksiniń 361-baby 4-bóligi 3-tarmaǵy («Aýyr zardaptarǵa ákep soqqan laýazymdyq ókilettikterdi teris paıdalaný») boıynsha berilgen bolatyn. Bul qylmystyń quramyn sot dálelsiz dep tapty. Nátıjesinde A.Jaqashevti «Salǵyrttyq» baby boıynsha kináli dep tanydy.

Sot Ashat Jaqashevtiń bostandyǵyn 3 jylǵa shektep, úsh jyl belgili bir qyzmetterdi atqarý quqyǵynan aıyrdy. Zardap shekkenderdiń azamattyq aryzy boıynsha talaptaryn sot qanaǵattandyrmady.

Іsti sottyń qaraýy kezinde Jaqashev qamaýda boldy. Úkimdi oqý kezinde sot zalynda otyrǵan onyń týystary men jaqyndary qýanyshtan kóz jasyn tııa almady. Keıin zalda dýǵol shapalaq soqty.

Eske salaıyq, byltyrǵy qyrkúıek aıynda Qostanaı oblysynyń Áýlıekól aýdanynda orman órti tutanǵan bolatyn. Ondaǵan úı zardap shekti.