Áýlıekól aýdanyndaǵy iri tabıǵı órt tolyq sóndirildi - TJD

NUR-SULTAN. QazAqparat - 10 qyrkúıekte saǵat 10:00-de Qostanaı oblysynyń Áýlıekól aýdanyndaǵy orman órti tolyqtaı sóndirildi, 7 qyrkúıekte saǵat 15:00-de órt aýyzdyqtalǵan bolatyn, dep habarlaıdy QazAqparat óńirdegi TJD silteme jasap.

Eske sala keteıik, 2 qyrkúıekte saǵat 15:10-da Áýlıekól aýdanynyń Basaman jáne Semıozer orman sharýashylyǵy basqarmalarynyń aýmaqtarynda aǵashtar men qurǵaq shópter órtengen bolatyn.

Órt aýmaǵy 43 myń gektardy qurady. Eki eldi mekendegi 91 turǵyn úı janyp ketti.

Evakýatsııalanǵandar úılerine oraldy, qalǵandary týystarynda qaldy. Órt bastalǵannan beri barlyǵy 2 091 adam evakýatsııalan bolatyn.

12 adam órt kezinde jeńil jáne ortasha aýyrlyqtaǵy jaraqattar, kúıikter alyp, ýlandy. Búginde zardap shekken 3 adam Áýlıekól aýdandyq aýrýhanada em qabyldap jatyr.

1935 jyly týǵan bir adam qaza tapty.

Jedel shtab jumysy bastalǵannan beri TJM jedel jelisine 38 qońyraý kelip tústi. 87 azamatqa konsýltatsııalyq-psıhologııalyq kómek kórsetildi, 45 balamen toptyq psıhologııalyq jumys júrgizildi.

Tikushaqtar áýeden 327 ret sý shashty.

Órtti sóndirýge 1 785 adam jáne 207 birlik tehnıkadan qurylǵan kúshter jáne quraldar jumyldyryldy.

Oqıǵa ornynda Basaman jáne Semıozer orman sharýashylyǵy basqarmasy 73 adam jáne 21 birlik tehnıkadan qurylǵan kúshteri men quraldary qalyp otyr.

Jedel shtab óz jumysyn aıaqtady.