Áýlıekól aýdanyndaǵy iri órt: Orman sharýashylyǵy mekemesiniń burynǵy basshysy sottaldy
Qostanaı qalasynyń №2 sotynyń úkimimen Basaman orman sharýashylyǵy mekemesiniń burynǵy basshysy abaısyzda aýyr zardaptarǵa ákep soqqan selqostyq tanytqany úshin sottaldy. Er adam 4,5 jylǵa bas bostandyǵynan aıyrý jazasyna kesildi, dep habarlaıdy Kazinform agenttiginiń tilshisi.
Birinshi ınstantsııa sotynyń 4 jyl merzimge bas bostandyǵyn shekteý úkimi joıyldy. Sot alqasy aǵash daıyndaýshylardyń áreketine jumyskerlerdi ýchaskelerge arnaıy bıletsiz jibergen orman sharýashylyǵy bóliminiń bastyǵy jaýapty bolýy tıis dep eseptep, jazalaý QK 361-babynyń 4-bóliginiń 3-tarmaǵy (aýyr zardaptarǵa ákep soqqan laýazymdyq ókilettikterin teris paıdalaný) boıynsha qaıta qarastyryldy.
“Laýazymdy tulǵa bola tura, ol ormanda jumys júrgizý úshin aǵash kesýshiler T., M., M., B., E., A.-lardy óziniń karta shotyna aqsha aýdarýdy mindettedi. Ol dırektor retinde memlekettik aǵash daıyndaýshylar brıgadalaryn taratyp, orman ýchaskelerin ózi jasaǵan jıyntyq akt boıynsha naqty belgilengen aǵash kesýshilerge jáne tıisti aǵash kesý bıletterin bermeı bólgen», - dep túsindirdi sottyń baspasóz qyzmetinen.
Іstiń barlyq mán-jaılary aıǵaqtarmen, sondaı-aq aqsha aýdarymdardyń bolýymen rastaldy (soma shamamen 15 mln. teńgeni qurady). Keltirilgen shyǵyn – 4 mln teńgeden astam.
“Zańsyz aǵash kesý faktileri Áýlıekól aýdandyq sotynyń sot aktilerimen anyqtaldy. Aǵash kesýshilerdiń jaýaptary, onyń esep shotyna aqsha aýdarymdary jáne zańdy kúshine engen sot aktileri J.-nyń aǵash daıyndaýshylardan aqsha alýy men aǵashty zańsyz kesý arasyndaǵy sebep-saldarlyq baılanysty rastaıdy” - delingen sotta.
Ormandardy qorǵaý týraly erejege jáne laýazymdyq nusqaýlyqtarǵa sáıkes J. orman sharýashylyǵy basqarmasynyń jumysyn uıymdastyrý jáne basqarýmen qatar, qoldanystaǵy zańnamaǵa sáıkes memlekettik qyzmet kórsetýdi (aǵash kesý jáne orman bıletterin berý) uıymdastyrady. Burynǵy basshy órt qaýpi joǵary kezeńde ormanda jumys isteýge tyıym salynǵanyn bilgenimen, aǵashty zańsyz kesýge jol bergen.
«Osylaısha, órtke qaýipti maýsymda aǵash kesýshilerge memlekettik orman qorynda jumys júrgizýge ruqsat bere otyryp, mundaı jumystarǵa tyıym salynǵanyn anyq bile tura, J. aǵash kesýshiler úshin artyqshylyqtar berdi, ıaǵnı óziniń qyzmettik ókilettikterin teris paıdalandy», - dep atap ótti vedomstvodan.
Bul dálelder isti qaıta saralaýǵa negiz boldy - QR QK 371-babynyń 2-tarmaǵy QK-361-babynyń 4-bóliginiń 3-tarmaǵyna aınaldy.
“Sot alqasy jazanyń túri men mólsherin taǵaıyndaý kezinde sottalǵan adamnyń jeke basyn, jasalǵan qylmystyń aýyrlyǵyn, jeke jáne zańdy tulǵalarǵa materıaldyq zııan keltirý ǵana emes, sonymen birge qorshaǵan ortaǵa jáne janýarlar dúnıesine zııan keltirý túrindegi zardaptardy, jaýapkershilik pen jazany jeńildetetin mán-jaılardyń bolýy jáne aýyrlatatyn mán-jaılardyń bolmaýy, sondaı-aq QK 52 jáne 55-baptarynyń talaptaryn eskerdi», - dep qorytyndylady sot alqasy.
Burynǵy basshy jazasyn ortasha tártiptegi qylmystyq-atqarý júıesi mekemesinde óteıdi.
Jábirlenrýshi azamattyq talapker - jeke tulǵalar, «Semıozernoe orman sharýashylyǵy mekemesi» MM jáne memleket múddesin kózdep talap aryz bergen prokýror talap aryzdy qanaǵattandyrýǵa quqyly dep tanylyp, onyń somasy týraly másele azamattyq sot isin júrgizýde qaraý úshin sotqa joldandy.
Eske sala ketsek, Qostanaı oblysy Áýlıekól aýdanynda 2022 jyly iri orman órti bolady. Ony sóndirýge segiz táýlik ketti.
Órt kezinde jalpy somasy 18 mlrd teńgeden astam 39 myń gektardan astam ormandy jáne ormandy emes alqap joıyldy. Sondaı-aq jalpy somasy 600 mln teńgeden astam turǵyn úıler, shaǵyn kásiporyndar, qural-jabdyqtar, orman sharýashylyǵynyń múlki órtendi. Materıaldyq shyǵynnyń ornyn toltyrý jáne órtti sóndirýge memleket bıýdjetten 2,5 mlrd teńgeden astam qarajat jumsady.
