«Áýlıeata jastary» baǵdarlamasymen 140 jas otbasy baspanaly bolady

TARAZ. QazAqparat - Bıyl Jambyl oblysynda «Áýlıeata jastary» baǵdarlamasy aıasynda 140 jas otbasy baspanamen qamtylady dep josparlanyp otyr, dep habarlaıdy QazAqparat tilshisi.

Bul týraly Jambyl oblysynyń ákimi Nurjan Nurjigitovtiń tóraǵalyǵymen ótken keńeste málim boldy.

Jıynda oblys ákimdiginiń áleýmettik salaǵa qatysty bólim basshylary esep bergen bolatyn.

Jastar saıasaty basqarmasynyń basshysy Jomart Zulpyhardyń aıtýynsha, búginde oblysta 14 pen 35 jas aralyǵynda 351 138 jas turady.

Bul - oblys halqynyń 30,5 paıyzy.

Jastardy baspanamen qamtamasyz etý maqsatynda bıyl «Áýlıeata jastary» turǵyn úıdi nesıelendirý baǵdarlamasyn júzege asyrýǵa 2 mıllıard teńge bólingen.

Onyń 1 mıllıard teńgesi jergilikti bıýdjetten qaralsa, taǵy 1 mıllıard teńgesi - «Otbasy banki» tarapynan.

Sonyń arqasynda 140 jas otbasyn baspanamen qamtamasyz etýge múmkindik týyp otyr.

Al jumyspen qamtýdyń belsendi sharalaryna 5 myńǵa jýyq jas tartylǵan.

Aıta keteıik, buǵan deıin biz Jambylda bıyl taǵy 106 úı asarlatyp salynyp, muqtajdarǵa beriletinin jazǵan bolatynbyz.

Jalpy, Jambyl oblysynda asarlatyp úı salý jobasy boıynsha 2020-2022 jyldar aralyǵynda 338 otbasy baspanamen qamtylǵan.