Áýlıeata óńirinde halyq sany 1 mln 100 myńnan asty

TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen beınekonferents-baılanys rejıminde ótken kezekti apparattyq keńeste ulttyq halyq sanaǵyn uıymdastyrý jáne ótkizý máseleleri qaraldy, dep habarlaıdy QazAqparat tilshisi.

Statıstıka departamentiniń basshysy Syrym Mádıevtiń aıtýynsha, halyq sanaǵynyń daıyndyq kezeńi 1-30 maýsym aralyǵynda ótken.

Intervıýerler mekenjaılardy, sondaı-aq onda turatyn halyqtyń naqty sanyn anyqtaý úshin árbir eldi mekendi aralaǵan. Aldyn ala málimet boıynsha, oblys halqynyń sany 1 120 293 adamdy quraǵan.

1 qyrkúıek pen 15 qazan aralyǵynda turǵyndar sanaqqa qatysty barlyq suraqtarǵa sanaq.gov.kz mamandandyrylǵan veb-saıty arqyly onlaın rejımde jaýap bere alady.

Dástúrli jappaı aralaý 1-30 qazan aralyǵyna josparlanǵan jáne onlaın-rejımde sanaqtan ótpegen respondentter arasynda júrmek.

«Birinshi kezeń barysynda birqatar ózekti máseleler anyqtaldy. Jýaly, Qordaı, T.Rysqulov aýdandarynyń keıbir eldi mekenderinde uıaly baılanys sapasyn jaqsartý boıynsha shuǵyl sharalar qabyldaý qajet», - dedi S. Mádıev.

Ol Taraz qalasy jáne aýdan ákimdikteri oblystyq polıtsııa departamentimen birlesip, ıntervıýerlerdiń qaýipsizdigin qamtamasyz etý qajettigin atap ótti.

«Sarysý, Talas, T.Rysqulov aýdandarynda keıbir eldi mekenderdiń ataýlary ákimshilik-aýmaqtyq obektiler jikteýishi men mekenjaı tirkelimi boıynsha sáıkes kelmeıdi», - dep atap ótti S. Mádıev.

Aımaq basshysy atalǵan úsh aýdan ákimderine osy máseleni sheshýdi tapsyrdy.

«Barlyq eldi mekenderdiń tizbesin ózektendirý qajet, onyń ishinde qalanyń saıajaı alqaptaryna, shalǵaı aýyldarǵa jáne shekara mańynda ornalasqan aýyldarǵa aıryqsha nazar aýdarǵan jón. Aldaǵy halyq sanaǵynyń áleýmettik-ekonomıkalyq mańyzy zor. Halyq sanaǵy barysynda alynǵan derekter árbir turǵyndy memlekettik qoldaýmen qamtýǵa múmkindik beredi», - dedi oblys ákimi.

Sondaı-aq, Berdibek Saparbaev aqparattyq-túsindirý jumysyn kúsheıtýdi jáne halyq sanaǵy týraly tolyq aqparatty áleýmettik jeliler men BAQ-ta júıeli túrde jarııalap otyrýdy tapsyrdy.