«Áýlıeata» kókpar komandasy 13-shi ret el chempıony boldy

Taraz qalasynda uıymdastyrylǵan kókpardan eresekter arasyndaǵy HHІІ Qazaqstan Respýblıkasynyń chempıonaty óz máresine jetti, dep habarlaıdy Kazinform.

Chempıonatqa elimizdiń 15 óńirinen 171 sportshy qatysqan bolatyn. 10 kúnge sozylǵan chempıonatta Jambyl oblysynyń «Áýlıeata» kókpar komandasy jeńiske jetip, Qazaqstannyń 13 dúrkin chempıony atandy. Al Qostanaı oblysynyń kókpar komandasy kúmis medalǵa qol jetkizdi. Túrkistan jáne Qyzylorda oblystarynyń komandalary qola medaldiń ıegerleri atandy.

Jeńimpazdar men júldegerler Qazaqstan Respýblıkasy kókpar federatsııasynyń taǵaıyndaǵan aqshalaı syıaqysymen marapattaldy. 1 oryn jeńimpazdary – 3 mıllıon, 2 oryn – 2 mıllıon, 3 oryndy ıelengender 1 mıllıon teńgege ıe boldy.

Sondaı-aq, chempıonat barysynda sheber óner kórsetken sportshylarǵa «Úzdik oıynshy», «Úzdik shabýylshy», «Úzdik qorǵaýshy», «Úzdik sáıgúlik», «Úzdik tóreshi», «Jeńiske degen erik-jigeri úshin» nomınatsııalary boıynsha 200 myń teńge, dıplomdar men medaldar tabystaldy.

Buǵan deıin Azııa para oıyndarynda barlyq sport túrinen medal alýǵa úmitti ekenimizdi jazǵan bolatynbyz.