Aýlasynda qoqys órtegen Oral turǵyny aýrýhanaǵa tústi
ORAL. QazAqparat – Qoqys jaǵamyn dep kúıip qalǵan oraldyq turǵyn aýrýhanaǵa tústi, dep habarlaıdy QazAqparat tilshisi.
Batys Qazaqstan oblystyq Tótenshe jaǵdaılar departamenti bastyǵynyń orynbasary Nurlan Taýbekovtiń brıfıngte búgin málim etkenindeı, 45 jastaǵy turǵyn turmystyq qaldyqtardy órtemek bolǵan.
Sonyń saldarynan úshinshi dárejeli kúıik alyp, qalalyq kópbeıindi aýrýhanaǵa jetkizildi.
«Bul, órt qaýipsizdigi erejelerin saqtaý qajettigin kórsetedi. Árkim óz úıiniń aýmaǵyn janatyn qaldyq, qoqys, japyraq, qurǵaq shópten tazartyp turýy kerek. Biraq olardy ǵımarattar men qurylysqa jaqyn jerge jaǵýǵa bolmaıdy. Kúnniń ystyǵyn, jeldiń ekpinin de eskerý qajet. Ásirese, órt qaýpi kúsheıetin qazirgideı kezeńde alaý jaǵýǵa tyıym salynady. Karantın shekteýleriniń jeńildetilýine baılanysty turǵyndar tabıǵat aıasyna jıi shyǵady, balalar da kóp ýaqytyn dalada ótkizedi. Sondyqtan órt qaýipsizdigin saqtaý adamdardyń ózine baılanysty ekendigin esten shyǵarýǵa bolmaıdy», - dedi N.Taýbekov.
Bıyl oblys aýmaǵynda 3 orman órti (ótken jyly osy kezeńde – 2) jáne jalpy aýdany 1946 gektardy quraıtyn 119 (ótken jyly osy kezeńde – 115) dalaly aýmaqtyń janý oqıǵasy tirkeldi.
Jyl basynan óńirde bolǵan 195 órt (2019 jyly osy merzimde – 234) oqıǵasynyń 134-i (158) turǵyn úı sektorynyń úlesinde. Saldarynan 3 adam (ótken jyly osy merzimde – 4) qaza tapsa, jeteýi (13) túrli jaraqat aldy.
«Qurǵaq shópti jaǵýǵa baılanysty órttiń kúrt artýy baıqalady. Ótken jylǵy qýraǵan shópti órteý tabıǵat úshin paıdaly jáne órtengen jerge shóp jaqsy ósedi degen qate pikir bar. Shyndyǵynda, tabıǵat úshin ottan asqan zııan joq», - delingen TJD aqparatynda.
Eske sala keteıik, budan buryn Oralda «Pıvovar» kafesi órtenip ketkenin jazǵan bolatynbyz.
