Aýlańyzdaǵy dúken zań buzyp otyr: Jastar qozǵalysy kásipkerdi qalaı zańǵa baǵyndyrdy
Jastar qozǵalysynyń ókilderi 13 maýsymda, «Zań» degen atpen azamattyq aktsııa ótkizgen bolatyn.
Sol kezde Kúıshi Dına 23/1 mekenjaıynda ornalasqan «Aıdyn» dúkeniniń qyzmetkeri 16 jastaǵy jasóspirimge qujatyn suramastan 40 gradýstyq ishimdik satqanyn anyqtaǵan.
Dúken ákimshiligi zań buzýdy doǵarý talabyna óte dóreki jaýap berip, óz kinásin moıyndamaı, qozǵalystyń belsendisine shabýyl jasaǵan.
«Sodan beri bir aı boıy «Aıdyn» dúkeninde «ıtalııalyq ereýil» ótkizip, dúken ıelerin ádetti tabystan aıyryp kórdik. Soǵan qaramastan, dúken ókilderi budan bylaı zań buzbaýǵa ýáde berýden bas tartty. Biz de alǵan betten aınymaı basqa ádisti paıdalandyq. Kúni boıy bizdiń belsendiler dúken aldynda velosıpedpen aınalyp júrip, mańaıdaǵy úılerdiń turǵyndaryna «Aıdyn» dúkeni zańǵa qaıshy áreketke baratynyn aıtyp júrdi. Kórshiler velopıketti belsendi talqylaǵan. Aýlaǵa ilingen bannerdi de jurt qyzý talqylady. Osylaısha bir aı ótkende ǵana dúken ákimshiligi kelissózge kóndi. Dúken ıesi óz kinásin moıyndap, kamera aldynda kámeletke tolmaǵan jastarǵa ishimdik satpaý týraly ýáde berdi. Endi sol ýádeniń qalaı oryndalǵanyn tekseremiz», - deıdi qozǵalys belsendisi Tólebı Bıqasym.
