Aýlanǵan ıesiz ıtterdi ustaý merzimi ózgeredi — zań jobasy

ASTANA. KAZINFORM — Májilistiń jalpy otyrysynda janýarlarǵa jaýapkershilikpen qaraý týraly zań jobasyn talqylaý kezinde depýtat Edil Jańbyrshın aýlanǵan ıtterdi kútip ustaý merzimine qatysty túsinik berdi. 

— Aýlanǵan janýarlardy ustaý merzimi engiziledi. Bastapqyda buralqy janýarlarǵa 15 kún merzim usynylǵan bolatyn. Alaıda zań jobasyn talqylaý barysynda ıkemdirek ári ómirge jaqyn sheshim qabyldandy, ıaǵnı eń tómengi ýaqytsha ustaý merzimi — keminde 5 kún, sonymen birge máslıhattarǵa bul merzimdi uzartý quqyǵy beriledi. Al ıesi bolýy múmkin qaraýsyz janýarlarǵa 60 kúndik merzim kózdelip otyr.

Munda bir nárseni óte anyq aıtý kerek. Zań jobasyna qatysty keıbir ortada «bul barlyq aýlanǵan janýardy mindetti túrde óltirýge ákeledi» degen emotsııalyq pikir taratylyp jatyr. Bul — shyndyqqa sáıkes kelmeıdi. Biz qatygezdikti usynǵan joqpyz. Biz usynyp otyrǵanymyz: tártip, baqylaý, jaýapkershilik jáne azamattardy qorǵaýdyń naqty tetigi. Eger máslıhattar uzaǵyraq merzim belgilese, mundaı janýarlar: uzaq ýaqyt ustalýy múmkin, jańa ıelerine berilýi múmkin, panajaılarda kútilýi múmkin, al múmkindik bolsa — tabıǵı ólimine deıin de ustalýy múmkin, — dedi Edil Jańbyrshın.

Sonymen birge olardy jańa ıelerine berý myna mindetti sharttar saqtalǵan jaǵdaıda júzege asady:

— sáıkestendirý,

— esepke qoıý,

— vaktsınatsııa,

— tıisti kútip-ustaý.

— Zań jobasy «jazalaý modelin» emes, jaýapty jáne baıypty modeldi usynyp otyr, — dedi depýtat.

Budan buryn habarlanǵandaı, sońǵy bir jyldyń ishinde elde 41 366 adamdy ıt qapqan.