Aýlalardy sý basty: Nur-Sultanda qar sýymen kúres qalaı júrgizilýde
NUR-SULTAN. QazAqparat – Elorda turǵyndary aýlalaryn sý basqanyna shaǵymdanyp jatyr. Alaıda qala ákimdigi sý tasqynyna qarsy jumystar qarqyndy júrgizilip jatqanyn málimdedi, dep habarlaıdy QazAqparat tilshisi.
«Almaty aýdanynda sý tasqynmen kúres, qar shyǵarý jáne aryqtardy tazalaý jumystary kúsheıtildi. Aýdannyń kommýnaldyq qyzmetteri táýlik boıy jumys istep jatyr», dep atap ótti astana ákimdiginen.
Al aýdan ákimdiginiń málimetinshe, arnaıy shtab qurylyp, sý tasqynyna qarsy sharalar jospary bekitilgen. Qazirgi ýaqytta aýdanda sý basý qaýpi bar jeti ýchaske anyqtalyp otyr.
Olar mynalar: Ońtústik-Shyǵys turǵyn úı alabynda Esil, Buqtyrma, Ertis, Qozybasy, Qobylandy batyr, Sarykól, Qońyraýly, Moıynty, Túlkibas, Baıantaý, Balbyraýyn, Shabyt kósheleri; Óndiris turǵyn úı alabynda Kókjelek, Báısheshek, Kókaral, Atamura kósheleri; Dostyq shaǵyn aýdanynda Golf klýbqa baratyn jol, Sútkent, Jylybulaq kósheleri; Jeleznodorojnyı turǵyn úı alabynda Imanaq, Tórequluly, Jabaev kósheleri, «Nurly jol» vakzaly aýdany jáne Indýstrıaldyq park aýmaǵy.
«Baıqońyr» aýdanynda ákimdik qyzmetkerleri kún saıyn sý basýy múmkin ýchaskelerdi aralap, ondaǵy jumys barysyn qadaǵalaýda. Shet aımaqtaǵy turǵyn alaptardan bólek, «Tulpar» saýda ortalyǵynyń da mańaıyndaǵy qazirgi jaǵdaı baqylaýǵa alynǵan.
«Qazirgi atalǵan aýmaqta joldardan erigen qar sýlaryn sorý, sondaı-aq sý basqan aýlalar boıynsha jumystar júrgizilýde. Atalǵan jumys barysyna arnaıy 5 birlik AS mashınasy bekitildi, qosymsha 4 birlik frontaldy tıegish, 8 birlik samosval jáne 8 adam jumyldyryldy», - dep atap ótedi aýdan ákimdiginen.
Saryarqa aýdanynda úsh qaýipti aımaq, tórt sazdy jer jáne turǵyn úı alaptaryndaǵy birqatar kóshe anyqtalyp otyr.
«Ókinishke oraı sý basý jylda qaıtalanady. Bul jerdiń ereksheligine baılanysty. Sondyqtan bizde is-árekettiń naqty algorıtmi bar», - dedi ákimdikten.
Baıqońyr aýdanynda da sý basý qaýpi bar ýchaskeler kúndelikti tekserilip otyr.
