AULAFIT jobasy bıyl Astananyń 30 aýlasyn qamtıdy
ASTANA. KAZINFORM – Elordada turǵyndardy buqaralyq sportqa tartýǵa baǵyttalǵan AULAFIT áleýmettik jobasynyń jańa maýsymy bastaldy.
Jobanyń ashylý rásimi «Qulager» turǵyn úı kesheniniń aýlasynda ótti. Іs-shara barysynda qatysýshylarǵa jazǵy maýsymda jumys isteıtin jattyqtyrýshylar quramy tanystyrylyp, jobanyń negizgi baǵyttary men aldaǵy josparlary tanystyryldy.
Astana qalasy Dene shynyqtyrý jáne sport basqarmasy basshysynyń orynbasary Azamat Aǵzamovtyń aıtýynsha, joba alty jyldan beri turǵyndar arasynda salaýatty ómir saltyn nasıhattap keledi.
«AULAFIT jobasy alty jyldan beri elorda turǵyndarynyń arasynda salaýatty ómir saltyn nasıhattap, buqaralyq sportty damytýǵa úles qosyp keledi. Osy ýaqyt aralyǵynda myńdaǵan astanalyq turaqty túrde jattyǵýlarǵa qatysyp, sportty kúndelikti ómiriniń ajyramas bóligine aınaldyrdy. Mundaı bastamalar turǵyndardyń densaýlyǵyn nyǵaıtyp qana qoımaı, belsendi qoǵam qalyptastyrýǵa da yqpal etedi. Sondyqtan qalada buqaralyq sportty damytý baǵytyndaǵy jumystar aldaǵy ýaqytta da jalǵasady», – dedi Azamat Aǵzamov.
Onyń málimetinshe, bıyl joba Astananyń alty aýdanyndaǵy 30 aýlada júzege asyrylady. Jattyǵýlar aptasyna alty kún ótkizilip, ártúrli jas sanattaryna arnalǵan baǵdarlamalardy qamtıdy.
Joba jetekshisi Aıtjan Mýsınniń aıtýynsha, AULAFIT-tiń basty ereksheligi – onyń barsha turǵyn úshin qoljetimdi bolýy.
«Jobanyń basty ereksheligi – onyń qoljetimdiliginde. Jattyǵýlarǵa úsh jastan bastap egde jastaǵy turǵyndarǵa deıin qatysa alady. Barlyq sabaqtar bilikti mamandardyń jetekshiligimen ótkizilip, qajetti sporttyq qural-jabdyqtarmen qamtamasyz etiledi. Eń bastysy – qatysý tolyqtaı tegin», – dedi ol.
Joba maýsymnan qyrkúıekke deıin jalǵasady. Baǵdarlama jalpy dene daıyndyǵy jattyǵýlaryn, fıtnes elementterin jáne belsendi qımyl-qozǵalys oıyndaryn qamtıdy.
Aıta keteıik, Qazaqstan 2026 jyly 20-ǵa jýyq halyqaralyq jarysty qabyldaıdy.
