Aýladaǵy oıyn, sport alańynda júrgen balanyń ata-anasy aıyppul tóleıdi
NUR-SULTAN. QazAqparat - Aýladaǵy oıyn, sport alańynda júrgen balanyń ata-anasyna aıyppul salynady. Bul týraly búgin Ortalyq kommýnıkatsııalar qyzmetindegi brıfıngte Nur-Sultan qalalyq Polıtsııa departamentiniń bastyǵy Erjan Sádenov aıtty, dep habarlaıdy QazAqparat tilshisi.
«Balalarǵa oıyn jáne sport alańynda júrýge tyıym salynǵan. Ákimdikpen birge barlyq balalar jáne sport alańdaryn arnaıy lentamen qorshap qoıdyq. Ol jerde sportpen aınalysýǵa, oınaýǵa bolmaıtyndyǵy týraly arnaýly belgi bar. Eger qazirgi ýaqytta ol jerde adamdar balalarymen birge júrse, onda olar jaýapqa tartylady», - dedi Erjan Sádenov.
Qalanyń bas polıtseıi asa qajettilik bolmasa úıden shyqpaý qajettigin basa aıtty. Sonymen qatar BAQ ókilderiniń «Karantın rejımin buzǵany úshin aıyp turaǵyna jetkizilgen kólik ıesi qansha aqsha tóleýi múmkin?» degen saýalyna jaýap berdi.
«Aıyp turaǵy tegin. Karantın talabyn buzýshyǵa qatysty hattama toltyrylyp, sot sheshimi shyǵarylady. Al kólik aıyp turaǵyna qoıylady jáne ol tegin», - dedi ol.
