Aýladaǵy qardy kóshege ýaqtyly shyǵarý qajet - TJD

ASTANA. QazAqparat – Elordanyń Tótenshe jaǵdaılar departamenti turǵyndardan qar kóshege ýaqytyly shyǵarýdy suraıdy, dep habarlaıdy QazAqparat tilshisi.

«Búginde qala aýmaǵynan 3,6 mln tekshe metrden astam qar shyǵaryldy. Sondaı-aq, 40 362 aryq jelileri tazartyldy, 3 825 metr qubyr býlandyryldy. 19 qańtardan bastap búgingi kúnge deıin bizdiń departament qyzmetkerleri qardy turǵyn úı aýmaǵynan kóshege ýaqtyly shyǵarý qajettigi týraly kópshilikti habardar etip jatyr. Qyzmetkerler jeke turǵyn úı sektorlaryn aralap, aqparattandyrýdy jalǵastyryp júr», - dedi Astana qalasy Tótenshe jaǵdaılar departamenti bastyǵynyń orynbasary Dastan Aldabekov qalalyq kommýnıkatsııalar qyzmeti alańynda ótken brıfıngide.

TJD basshysynyń orynbasary keltirgen málimetke sáıkes, qardy qala aýmaǵynan ýaqtyly shyǵarýǵa qatysty 56 reıd uıymdastyrylyp, 1 611 dana aqparattyq materıal taratyldy.

Sondaı-aq, brıfıng barysynda elordada 21 ýchaskeni sý basý qaýpi bary aıtyldy. Mamandardyń aıtýynsha, sý tasqynynyń aldyn alý jumystary júrip jatyr.