Aýqymdy operatsııa: Elordada 30 mln teńgeniń esirtkisi tárkilendi
NUR-SULTAN. QazAqparat - Elorda polıtsııasy esirtki satýshylardy ustaýǵa baǵyttalǵan aýqymdy arnaıy operatsııa ótkizdi, dep habarlaıdy QazAqparat tilshisi.
Nur-Sultan qalalyq Polıtsııa departamentiniń málimetinshe, jedel izdestirý sharalaryn ótkizý barysynda Jeńis kóshesi boıynda buǵan deıin isti bolǵan 39 jastaǵy qala turǵyny ustaldy. Onyń sómkesin tintý barysynda gashısh salynǵan 13 polıetılen paketi tabyldy. Sondaı-aq kúdikti turyp jatqan páterdi tintý barysynda gashısh salynǵan 3 polıetılen paketi jáne satýǵa daıyn esirtki salynǵan 32 túıinshek tárkilendi.
«Arnaıy operatsııa nátıjesinde zańsyz aınalymnan shamamen 20 keli esirtki zaty tárkilendi. Onyń qara bazarda bólshek saýda kezindegi quny 30 mln teńgeden asyp jyǵylady. Elorda aýmaǵyna esirtki jetkizýge jáne satýǵa qatysy bar qylmystyq tizbeniń ózge de qatysýshylaryn anyqtaýǵa baǵyttalǵan jedel izdestirý sharasy júrgizilip jatyr», - dedi vedomstvodan.
Qazirgi ýaqytta ustalǵan adamnyń ústinen QR Qylmystyq kodeksiniń 296-baby 4-bóligi, 297-baby 3-bóligi jáne 287-baby 2-bóligi boıynsha qylmystyq is qozǵalǵan. Kúdikti 10-nan 25 jylǵa deıin bas bostandyǵynan aıyrylýy múmkin. Ol Nur-Sultan qalalyq PD ýaqytsha ustaý oqshaýlaǵyshyna qamaldy. Tergeý amaldary júrgizilip jatyr.
