Aýqymdy operatsııa: 11 adam ustalyp, quny 2 mlrd teńge bolatyn kıik múıizderi tárkilendi

NUR-SULTAN. QazAqparat – Qazaqstannyń úsh óńirinde bir mezette brakonerler men kıik múıizin satyp alýshylardy ustaý operatsııasy júrgizildi. Bul týraly QR ІІM baspasóz qyzmetiniń ókili Shuǵyla Turlybek aıtty, dep habarlaıdy QazAqparat tilshisi.

«Іshki ister mınıstrligi Nur-Sultan qalalyq, Batys Qazaqstan jáne Qaraǵandy oblystyq aýmaqtyq polıtsııa departamentterimen birlesip, kıikterge zańsyz ańshylyq jasaýmen jáne odan tabys tabýymen aınalysqan qylmystyq toptardyń joly kesýge baǵyttalǵan aýqymdy arnaýly operatsııa júrgizdi. Atap aıtqanda, 8 jáne 9 sáýirde úsh óńirdiń krımınaldyq polıtsııa qyzmetkerleri 11 adamdy ustap, olardan myńnan astam kıik múıizi tárkilendi. Aldyn ala esepteýge sáıkes, memleketke kelgen shyǵyn somasy shamamen 2 mlrd teńgeni quraıdy», - dedi ol.

Onyń atap ótýinshe, QR Qylmystyq kodeksiniń 33-babymen qylmystyq is qozǵaldy. Tıisti saraptamalar taǵaıyndaldy. Saraptamalardyń nátıjesinde qorshaǵan ortaǵa keltirilgen ekologııalyq shyǵyn anyqtalatyn bolady.

«Qylmystyq toptyń qalǵan qatysýshylaryn, sonymen qatar múıizderdi satý arnasyn anyqtaýǵa baǵyttalǵan jedel tergeý is-sharalary júrgizilip jatyr», - dedi Shuǵyla Turlybek.