Aýqymdy ári mańyzdy – Rahym Oshaqbaev Prezıdenttiń sharalar paketi týraly
«Biz elimizde jarııalanǵan sharalar legin jınaqtap, ony shartty túrde «Áleýmettik sharalardyń prezıdenttik paketi» dep atadyq. Oǵan 42 500 teńgelik áleýmettik tólem, zeınetaqynyń ındeksatsııasy, jyldyq 10 paıyzdyq memlekettik járdemaqy, nesıeni 90 kúnge shegerý, kommýnaldyq shyǵyndar úshin 15 myń teńgeden bólý, áleýmettik mańyzy bar taýarlardy memlekettik retteý, «Jumyspen qamtýdyń jol kartasy» memlekettik baǵdarlamasyna bólinetin qarajatty 1 trln teńgege deıin arttyrý qadamdaryn jatqyzdyq», - dedi Rahym Oshaqbaev onlaın rejımdegi dóńgelek ústel barysynda.
Ortalyq basshysynyń aıtýyna qaraǵanda bul aýqymdy ári mańyzdy sharalar sanalady.
«Prezıdenttiń áleýmettik sharalar paketi qazirgi tańda áleýmettik saıasatta Úkimet tarapynan kedergisiz oryndalýy tıis tapsyrmaǵa jatady. Jalpy álemdik tájirıbede áleýmettik saıasat modeli úshke bólinedi. Olar: skandınavııalyq, kontınentaldyq jáne anglo-saksondyq. Atap ótken amaldardyń sońǵysy jeke qamtamasyz etý, joǵary jaýapkershilik sıpatyna ıe. Kontınentaldyq amal – áleýmettik qorǵaý salasyna basa mańyz beretin eýropalyq model. Skandınavııalyq model – memlekettiń áleýmettik kepildikteriniń ámbebap sıpatqa ıe bolýy. Ondaıda memleket halyqtyń áleýmettik ál-aýqaty úshin jaýapkershilikti ózine alady», - dedi spıker.
Osylaı deı kele Rahym Oshaqbaev qazaqstandyq model týraly sóz qozǵady.
«Eger biz qazaqstandyq model týraly aıtar bolsaq, áleýmettik qamtamasyz etý, densaýlyq saqtaý jáne bilim berý salasynda mınımaldy paketter qarastyrylǵan. Oǵan jumyssyzdardy áleýmettik qoldaý, eń tómengi aılyq, zeınetaqy, medıtsınalyq kómektiń kepildendirilgen kólemi, tegin orta bilim, tegin joǵary bilimdi konkýrstyq negizde alý, qoljetimdi aqyǵa azamattarǵa úı usyný sharalary enedi», - dedi ol.
