Aýqymdy ózgerister: Májilis Ádiletti Qazaqstan qurý qaǵıdattaryna súıengen rezolıýtsııany qabyldady
ASTANA. KAZINFORM – Búgin Parlament Májilisiniń jalpy otyrysynda elimizdiń barlyq progressıvti qoǵamdyq-saıası kúshterin Memleket basshysynyń tóńireginde toptasýǵa jáne Ádiletti Qazaqstan qurý qaǵıdattaryna negizdelgen rezolıýtsııa (qarar) qabyldandy.
Aıta keteıik, palata otyrysynda Májilis tóraǵasy Erlan Qoshanov «Prezıdent Qasym-Jomart Toqaevtyń saıası reformalaryn iske asyrý – memlekettik qurylystyń jańa tarıhı kezeńi» atty baıandama jasady.
Bul rette ol elimizdiń barlyq progressıvti qoǵamdyq-saıası kúshterin Memleket basshysynyń tóńireginde toptasýǵa jáne Ádiletti Qazaqstan qurý qaǵıdattaryna negizdelgen rezolıýtsııa qabyldaýdy usynǵan edi.
- Men jańa ǵana óz sózimde elimizdiń barlyq progressıvti qoǵamdyq-saıası kúshterin Memleket basshysynyń tóńireginde toptasýǵa jáne Ádiletti Qazaqstan qurý qaǵıdattaryna negizdelgen rezolıýtsııa qabyldaýdy usyndym. Bul – Parlament Májilisiniń rezolıýtsııasy... Búgin mazmundy ári salıqaly jıyn boldy. Talqylaý barysynda eldegi aýqymdy ózgeristerdiń barlyq tusy qamtyldy dep oılaımyn. Sóz sóılegen ár azamat óziniń qundy usynystaryn jarııalady. Solardyń barlyǵy muqııat zerdelenedi. Memleket basshysy aıqyndap bergen joldan jańylmaýymyz qajet. Prezıdent reformalaryn iske asyrý aldaǵy ýaqytta da barshamyzdyń basty mindetimiz bolyp qala beredi, - dedi Erlan Qoshanov.
Jalpy otyrys barysynda palata depýtattary atalǵan usynysqa qoldaý bildirdi.
Budan buryn habarlanǵandaı, belgili ekonomıst Jaqsybek Kúlekeev elimizdegi ózgerister aıasynda orta bıznestiń damýyna jaǵdaı jasalyp jatqanyn aıtty.
Ulttyq ǵylym akademııasynyń vıtse-prezıdenti Asqar Jumadildaev elimizdegi ǵylym salasyn damytýǵa qatysty usynysyn jarııalady.