Aýqymdy qurylys: Nurlybek Nálibaev qarajattyń qaı salalarǵa bólinetinin túsindirdi
ASTANA. KAZINFORM — Premer-mınıstrdiń birinshi orynbasary Nurlybek Nálibaev Jalpyulttyq aýqymdy qurylys jyly aıasynda óńirlerde qandaı nysandar salynatynyn jáne olarǵa qansha qarajat baǵyttalatynyn aıtyp berdi.
Onyń aıtýynsha, Qazaqstan damýdyń jańa tarıhı kezeńine qadam basty. Elimiz aýqymdy saıası reformalardy tabysty júzege asyrdy. Onyń aıasynda halqymyzdyń ál-aýqatyn arttyrýǵa baǵyttalǵan asa mańyzdy bastamalar qolǵa alyndy.
2027 jyl Jalpyulttyq aýqymdy qurylys jyly dep jarııalandy. Memleket basshysynyń tapsyrmasyna sáıkes, 2029 jyldyń sońyna deıin elimizdiń barlyq óńirlerinde áleýmettik, kólik jáne ınjenerlik ınfraqurylym jobalaryn iske asyrýǵa Ulttyq qordan shamamen 6,5 trln teńge baǵyttalady.
— Bul jumystar bastalyp ta ketti. Qurylǵan ınfraqurylymdy damytý qory aıasynda jalpy somasy 1,5 trln teńge bolatyn 262 joba maquldandy. Birinshi kezekte qomaqty qarajat áleýmettik ınfraqurylymdy damytýǵa baǵyttalyp jatyr. Atap aıtqanda, densaýlyq saqtaý salasynda jalpy 344 mlrd teńgege 41 joba iske asyrylady. Bul qarajatqa jańa aýrýhanalar, perınataldyq ortalyqtar jáne perzenthanalar salynady, — dedi Nurlybek Nálibaev Úkimette ótken baspasóz máslıhatynda.
Mádenıet, týrızm jáne sport salalaryn damytýǵa — 266 mlrd teńge qarjy baǵyttalyp, 23 nysan salynady. Olardyń qatarynda sport keshenderi, mádenıet saraılary, teatrlar basqa da áleýmettik mańyzdy nysandar boı kóteredi.
Bilim berý salasynda — mektepter men kópfýnktsıonaldy keshenderdiń qurylysyn qosa alǵanda 101 mlrd teńgege 28 joba iske asyrylady.
Kólik ınfraqurylymyn damytýǵa 369 mlrd teńge qarastyrylǵan. Bul qarajatqa birqatar jol qaıta jańǵyrtýdan ótedi. Jańa avtomobıl joldary, kópirler salynyp, 48 joba iske asyrylady.
— Sýmen jabdyqtaý, sý burý júıelerin damytýǵa 284 mlrd teńge baǵyttalyp, 55 nysan qamtylady. Olardyń qatarynda magıstraldyq sý qubyrlary, tazartý qurylystary, qorǵanys bógetteri men sý bógetteri bar. Jylýmen jáne gazben jabdyqtaý júıelerin damytý boıynsha 67 jobany damytýǵa 136 mlrd teńge qarastyrylǵan. Bul qaǵaz betindegi jospar ǵana emes, osy 122 jobany iske asyrýǵa qazirdiń ózinde naqty 497 mlrd teńge qarjy bólindi, — dedi vıtse-premer.
Nurlybek Nálibaev ınfraqurylymdy jańǵyrtýǵa baǵyttalǵan 6,5 trln teńgeniń barlyǵy Úkimettiń qatań baqylaýynda bolatynyn erekshe atap ótti.
Qurylys salasy árdaıym el ekonomıkasynyń negizgi qozǵaýshy kúshiniń biri bolyp keledi. Bıylǵy 9 aıda qurylys jumystarynyń kólemi 7,8 trln teńge bolyp, ótken jylmen salystyrǵanda 11,5% ósti. Jyl sońyna deıin respýblıka boıynsha 20 mln sharshy metrden astam turǵyn úı paıdalanýǵa beriledi.
— Endi Memleket basshysynyń Qazaqstan halqyna Joldaýynda bergen tapsyrmasyna sáıkes, biz Aýqymdy halyqtyq qurylys baǵdarlamasyn ázirleýge kiristik. Onyń aıasynda respýblıka boıynsha qurylys kólemi arta túsedi. Qurylys júrip jatqan nysandardyń sapasy men qaýipsizdigin qamtamasyz etýge erekshe nazar aýdarylady. Qarajattyń jumsalýyna qoǵamdyq baqylaýdy qamtamasyz etý úshin Halyqtyq qurylys jónindegi memlekettik komıssııa qurylady. Aýqymdy qurylys jumystary otandyq qurylys materıaldarymen jáne óndiristik bazamen qamtamasyz etiledi, — dedi spıker.
Buǵan deıin Prezıdent Qasym-Jomart Toqaev «Halyqtyq qurylysqa» 6,5 trln teńge bólinetinin aıtqan edi.
