Aýktsıonǵa qosymsha barlaý jumystaryn talap etetin az zerttelgen jer qoınaýy ýchaskeleri qoıylady - mınıstr
ASTANA. QazAqparat - Aýktsıonǵa qosymsha barlaý jumystaryn talap etetin az zerttelgen jer qoınaýy ýchaskeleri qoıylady.
Bul týraly búgin Astanada «MINEX Ortalyq Azııa» taý-ken ónerkásibi forýmynda QR Investıtsııalar jáne damý mınıstri Áset Isekeshev málim etti.
Onyń aıtýynsha, qazir Qazaqstan eski tájirıbeden bas tartty jáne jer qoınaýyn paıdalaný salasynda aýktsıon arqyly saýdaǵa shyǵarý sııaqty neǵurlym progressıvti tájirıbege kóship otyr.
«Aýktsıonǵa qosymsha barlaý jumystaryn talap etetin az zerttelgen jer qoınaýy ýchaskeleri qoıylady. Ýchaskeler ádeıi monoqalalar mańynan tańdalyp alynady, sebebi onda osy arqyly jumys oryndaryn saqtap qalýǵa bolady jáne onda qajetti resýrstyq baza shoǵyrlanǵan. 2015 jyly jeltoqsanda ótken aýktsıondar kezinde 36 lot boıynsha kelisimsharttyq bonýstar retinde bıýdjetke 1,5 mlrd. teńge qarajat tartyldy. Jalpy aýkıon - baıqaýdyń eń ashyq jáne móldir ádisi bolyp tabylady. Onda satylym qorytyndysy qatysýshylardyń aldynda jarııa etiledi. Jalpy ınvestorlar onyń qoljetimdiligin, ashyqtyǵyn jáne qarapaıymdylyǵyn aıtyp, oń baǵasyn berdi», - dedi mınıstr.
