Aýktsıondy saýda-sattyq elektr energııasynyń tarıfine qalaı áser etedi
ASTANA. QazAqparat - Aýktsıondy saýda-sattyq energııanyń balamaly qýat kózderinen alynatyn elektr energııasynyń tarıfin 20 paıyzǵa deıin tómendetetin bolady. Bul týraly Parlament Senatynda ótken dóńgelek ústel kezinde Energetıka vıtse-mınıstri Mahambet Dosmuhambetov málim etti, dep habarlaıdy QazAqparat tilshisi.
Qazirgi ýaqytta Qazaqstanda balamaly qýat kózderiniń jalpy qýaty 340 megavatt bolatyn 55 nysan bar. Naqtyraq aıtqanda, qýaty 110 megavattyq jel energııasynyń, 170 megavattyq gıdroenergetıkanyń, 60 megavattyq kún energııasynyń nysandary jumys istep tur. Olardyń barlyǵy jyl saıyn qýaty 1 mıllıard kılovat-saǵat elektr energııasyn óndiredi.
«Biz qazirgi ýaqytta ınvestorlar energetıkanyń atalmysh salasyna qyzyǵýshylyq tanytyp otyrǵanyn kórip otyrmyz. Máselen, 2020 jyldyń sońyna deıin balamaly qýat kózderiniń qýaty 1700 megavattyq qosymsha 53 nysanyn qoldanysqa engizý kózdelgen. Tarqata aıtqanda, atalǵan merzimge deıin qýattylyǵy 933 megavattyq 23 jel elektrstantsııasy, 467 megavattyq 17 kún elektr stantsııasy men 290 megavattyq gıdroelektrostantsııany paıdalanýǵa berý kózdelgen», - deıdi vıtse-mınıstr.
Mahambet Dosmuhambetovtyń aıtýynsha, memlekettiń qoldaýynsyz energııanyń balamaly kózderi tıimdi túrde damý dańǵylyna túse almaıdy. Osy sebepti Qazaqstanda 2009 jyldan bastap memlekettik qoldaý sharalary qarastyrylǵan.
Vıtse-mınıstrdiń habarlaýynsha, balamaly qýat kózderi aýktsıonynyń alǵashqy sessııasy 23 mamyr men 7 maýsymnyń aralyǵynda ótken. Investorlarǵa balamaly qýat kózderiniń barlyq tıpteri usynylǵan. Mahambat Dosmuhambetov aıtyp ótkendeı, aýktsıondyq saýda-sattyqty júrgizý nátıjesinde tarıf jel elektr stantsııalarynda 20 paıyzǵa, al shaǵyn GES-terde 23 paıyzǵa, al kún elektr stantsııalarynda 25,5 paıyzǵa tómendegen.
